នៅក្នុងសេចក្តីថ្លែងការណ៍មួយ ទីភ្នាក់ងារជនភៀសខ្លួនអង្គការសហប្រជាជាតិ (UNHCR) បានឲ្យដឹងថា ប្រទេសស៊ូដង់កំពុងប្រឈមនឹងវិបត្តិជនភៀសខ្លួនដ៏ធ្ងន់ធ្ងរបំផុតរបស់ពិភពលោក ដោយមនុស្សជិត ១៣លាននាក់ ត្រូវភៀសខ្លួនដោយសារជម្លោះដ៏រ៉ាំរ៉ៃនៅក្នុងប្រទេសនេះ ក្នុងនោះចំនួនជិត ៤លាននាក់បានភៀសខ្លួនទៅកាន់ប្រទេសជិតខាង គិតចាប់តាំងពីជម្លោះបានផ្ទុះឡើងកាលពីថ្ងៃទី១៥ ខែមេសា ឆ្នាំ២០២៣។

អ្នកនាំពាក្យ UNHCR លោកស្រី Olga Sarrado បាននិយាយនាពេលថ្មីៗនេះថា នៅស៊ូដង់ មនុស្សភៀសសឹកក្នុងប្រទេស (IDPs) ដែលមានចំនួនជាង ៨លាននាក់ កំពុងជួបការលំបាកក្នុងការទទួលបានទឹកស្អាតប្រើប្រាស់ ខណៈដែលជំរុំជនភៀសខ្លួនក្នុងប្រទេសនានា ដូចជាស៊ូដង់ខាងត្បូង ឆាដ និងអ៊ូហ្គង់ដាជាដើម មានភាពចង្អៀតណែនខ្លាំង ដែលធ្វើឲ្យស្ត្រី និងកុមារងាយរងគ្រោះជាពិសេស។

កំពង់ផែស៊ូដង់ ដែលមានទីតាំងនៅតាមបណ្ដោយឆ្នេរភាគខាងកើត នៅតែមានស្ថិរភាព ដោយសារមិនមានពាក់ព័ន្ធនឹងការប្រយុទ្ធដោយផ្ទាល់ ដែលធ្វើឲ្យវាក្លាយជាចំណុចប្រមូលផ្តុំដ៏ធំមួយ សម្រាប់ជនភៀសខ្លួនស៊ូដង់។ អាជ្ញាធរក្នុងតំបន់ បានបង្កើតជំរុំជនភៀសខ្លួនរាប់សិបកន្លែង ដោយផ្តល់ជម្រកដល់មនុស្សជាង ២០០.០០០នាក់ដែលភៀសខ្លួនចេញពីតំបន់ជម្លោះ។

ដោយការផ្គត់ផ្គង់សំខាន់ៗ ដូចជាអាហារ និងថ្នាំ ខ្វះខាត ក៏ដូចជាការរំខានជាញឹកញាប់ដោយការដាច់ទឹក និងចរន្តអគ្គិសនី ជីវភាពរស់នៅរបស់ប្រជាជនដែលភៀសខ្លួនជាច្រើន មានការលំបាកយ៉ាងខ្លាំង។

ជម្លោះ នៅស៊ូដង់ បានអូសបន្លាយអស់រយៈពេល ២ឆ្នាំមកហើយ។ នៅពេលជម្លោះឡើងដល់កម្រិតខ្លាំងក្លាបំផុត រដ្ឋ ១៥ នៃរដ្ឋចំនួន ១៨ របស់ប្រទេសស៊ូដង់ ត្រូវបានគ្របដណ្ដប់ដោយអំពើហិង្សា ហើយភូមិកំណើតរបស់ជនភៀសខ្លួនជាច្រើនត្រូវបានធ្វើឲ្យក្លាយជាទីនៃគំនរបាក់បែក៕