កាសែត New York Times បានរាយការណ៍នៅថ្ងៃពុធ (១៦ មេសា) ដោយដកស្រង់សម្តីមន្ត្រីរដ្ឋបាលអាមេរិក និងប្រភពផ្សេងទៀតថា ប្រធានាធិបតីអាមេរិក លោក Donald Trump បានរារាំងផែនការវាយប្រហារមួយរបស់អ៊ីស្រាអែល ដែលបានគ្រោងទុក លើទីតាំងនុយក្លេអ៊ែរអ៊ីរ៉ង់ ដើម្បីគាំទ្រការចរចាកិច្ចព្រមព្រៀងជាមួយអ៊ីរ៉ង់ ក្នុងការដាក់ដែនកំណត់កម្មវិធីនុយក្លេអ៊ែររបស់ខ្លួន។

New York Times បានឱ្យដឹងថា អ៊ីស្រាអែល បានបង្កើតផែនការវាយប្រហារទីតាំងនានារបស់អ៊ីរ៉ង់ក្នុងខែឧសភា ដោយបន្ថែមថា គោលដៅនៃផែនការនោះគឺដើម្បីបង្អាក់សមត្ថភាពអភិវឌ្ឍអាវុធនុយក្លេអ៊ែររបស់ទីក្រុងតេអេរ៉ង៉ ឱ្យដើរថយក្រោយរយៈពេលមួយឆ្នាំ ឬច្រើនជាងនេះ។

សារព័ត៌មាននេះនិយាយថា អ៊ីស្រាអែល បានទាមទារជំនួយពីអាមេរិក ដើម្បីទប់ស្កាត់ការសងសឹករបស់អ៊ីរ៉ង់ ហើយថែមទាំងចង់ធានាថា ការវាយប្រហារនឹងទទួលបានជោគជ័យ។ បន្ទាប់ពីការជជែកពិភាក្សាផ្ទៃក្នុងជាច្រើនខែ លោក Trump បានសម្រេចចិត្តចរចាជាមួយអ៊ីរ៉ង់ ជាជាងគាំទ្រសកម្មភាពយោធា។

អាមេរិក និងអ៊ីរ៉ង់ បានជួបពិភាក្សាគ្នាក្នុងប្រទេសអូម៉ង់ កាលពីថ្ងៃសៅរ៍ចុងសប្តាហ៍មុន ដែលជាលើកទីមួយហើយក្នុងអំឡុងពេលរដ្ឋបាលលោក Trump រួមទាំងអាណត្តិទី១ របស់លោកក្នុងឆ្នាំ២០១៧-២០២១។ ប្រទេសទាំងពីរបានពណ៌នាកិច្ចពិភាក្សានេះថាមានលក្ខណៈវិជ្ជមាន និងស្ថាបនា។

កិច្ចពិភាក្សាជុំទី២ ត្រូវបានកំណត់ពេលសម្រាប់ថ្ងៃសៅរ៍ ចុងសប្ដាហ៍នេះ ហើយប្រភពដែលបានរាយការណ៍ពីផែនការបាននិយាយថា កិច្ចប្រជុំនេះទំនងជានឹងធ្វើឡើងនៅទីក្រុងរ៉ូម របស់អ៊ីតាលី៕