​ឥណ្ឌូណេស៊ី៖ ក្រុម​មន្ត្រី​បាន​និយាយ​កាលពី​ថ្ងៃអាទិត្យ​ថា ចំនួន​អ្នក​ស្លាប់​បន្ទាប់ពី​ការ​ផ្ទុះ​ភ្នំភ្លើង​ខ្ពស់​បំផុតនៅ​លើ​កោះ​ជ្វា ដែល​មានប្រជា​ជន​ច្រើន​ជាង​គេ​រស់នៅ​របស់​ប្រទេស​ឥណ្ឌូនេស៊ីបាន​កើនឡើង​ដល់​ ១៤​នាក់ និង​រង​របួស​ច្រើន​នាក់ ខណៈ​ដែល​កម្ទេចកំទី និង​ដីល្បាប់ក្រាស់បានរារាំង​ដល់​កិច្ច​ខិតខំ​ប្រឹងប្រែង​ស្វែងរក​ជនរងគ្រោះ​។

ភ្នំភ្លើង Semeru ក្នុងស្រុក Lumajang ខេត្ត​ជ្វា​ភាគ​ខាងកើត​បាន​បញ្ចេញ​ផេះ​ដ៏​ក្រាស់​ជាង ១២,០០០​ម៉ែត្រ​ទៅលើ​អាកាស ហើយ​កម្អែល​ភ្នភ្លើង​បាន​ហូរ​ចុះ​តាម​ជម្រាល​ភ្នំ​បន្ទាប់ពី​មានការ​ផ្ទុះ​ភ្លាមៗ​កាលពី​ថ្ងៃ​សៅរ៍ ដែល​បង្កឡើង​ដោយ​ភ្លៀង​ធ្លាក់​ខ្លាំង​។ ភូមិ​ជាច្រើន​ត្រូវ​បាន​គ្របដណ្ដប់​ដោយ​ផេះ​ដែល​ធ្លាក់​មក​។ នៅ​គ្លីនិក​មួយ​នៅ​ក្នុង​ភូមិ Pronojiwo អ្នកជំងឺ​បាន​ត្អូញត្អែរ​នៃ​ការពិបាក​ដកដង្ហើមដោយសារ​តែ​ផេះ​ភ្នំភ្លើង​។ អ្នកជំងឺ​មួយ​ចំនួន​ត្រូវ​បាន​បញ្ជូន​ទៅ​មន្ទីរពេទ្យ ​បន្ទាប់ពី​ទទួល​បាន​ជំនួយ​បឋម​ដោយ​អង្គភាព​សង្គ្រោះ​បន្ទាន់​។ ប្រធាន​គ្លីនិក Pronojiwo លោក​វេជ្ជបណ្ឌិត Miftahul Ulum បាន​និយាយ​ថា អ្នកជំងឺ​ដែល​ចូល​មក​តាំងពី​ថ្ងៃ​សៅរ៍ ភាគច្រើន​បានត្អូញត្អែរអំពី​ការពិបាកដកដង្ហើម និង​ការ​រលាកភ្លើង​។

លោក Eko Budi Lelono ប្រធានមជ្ឈមណ្ឌល​ស្ទង់​ភូមិសាស្ត្រ​បាន​និយាយ​ថា លំហូរ​កម្អែល​ភ្នំភ្លើង​បាន​ហូរ​ទៅកាន់​ទន្លេ​ក្បែរ​នោះ​។ ការរាយការណ៍​របស់​ទូរទស្សន៍បាន​បង្ហាញ​សកម្មភាព​ប្រជាជន​បាន​ស្រែក និង​រត់​នៅ​ក្រោម​ពពក​ផេះ​ដ៏​ក្រាស់ ផ្ទៃមុខ​របស់​ពួកគេ​សើមដោយសារ​ភ្លៀង​លាយឡំ​ជាមួយ​ធូលី​ភ្នំភ្លើង​។ ការ​ផ្ទុះ​ភ្លើង Semeru លើក​ចុង​ក្រោយ​គឺ​ក្នុង​ខែ​មករា ប៉ុន្តែ​គ្មាន​អ្នក​រង​របួស​នោះ​ទេ​។ ប្រទេស​ឥណ្ឌូនេស៊ី​ដែល​ជា​ប្រជុំ​កោះ​មាន​ប្រជាជន​ជាង ២៧០​លាន​នាក់ងាយ​នឹង​កើតមាន​ការ​រញ្ជួយ​ដី ​និង​សកម្មភាព​ភ្នំភ្លើងដោយ​សារតែ​វា​ស្ថិត​នៅ​តាម​បណ្ដោយនៃ​កង​ភ្លើង​នៅ​មហាសមុទ្រ​ប៉ាស៊ីហ្វិក៕

អត្ថបទ៖ ប៊ុនថន