ការិយាល័យប្រធានាធិបតីម៉ាល់ឌីវ បាននិយាយកាលពីថ្ងៃពុធ (១៦ មេសា) ថា ប្រទេសកោះម៉ាល់ឌីវ បានហាមប្រាមអ្នកកាន់លិខិតឆ្លងដែនអ៊ីស្រាអែល មិនឱ្យចូលទៅក្នុងទឹកដីរបស់ខ្លួន ដោយចោទអ៊ីស្រាអែលថា បានប្រព្រឹត្តអំពើប្រល័យពូជសាសន៍ប្រឆាំងនឹងជនជាតិប៉ាឡេស្ទីននៅក្នុងសង្គ្រាមហ្កាហ្សា ដោយនោះជាអ្វីដែលអ៊ីស្រាអែល បានបដិសេធម្តងហើយម្តងទៀត។

សេចក្តីថ្លែងការណ៍និយាយថា ប្រធានាធិបតីម៉ាល់ឌីវ លោក Mohamed Muizzu បានផ្តល់សច្ចាប័នលើវិសោធនកម្មច្បាប់ស្តីពីអន្តោប្រវេសន៍របស់ប្រទេស បន្ទាប់ពីត្រូវបានអនុម័តដោយសភាកាលពីថ្ងៃអង្គារ ហើយវិសោធនកម្មនេះណែនាំពីបទប្បញ្ញត្តិថ្មីចំពោះច្បាប់អន្តោប្រវេសន៍ ដោយហាមដាច់ខាតនូវការចូលរបស់ភ្ញៀវមានលិខិតឆ្លងដែនអ៊ីស្រាអែល ទៅកាន់ម៉ាល់ឌីវ។

សេចក្តីថ្លែងការណ៍បន្ថែមថា "ការផ្តល់សច្ចាប័ននេះឆ្លុះបញ្ចាំងពីជំហរដ៏ម៉ឺងម៉ាត់របស់រដ្ឋាភិបាលក្នុងការឆ្លើយតបទៅនឹងអំពើឃោរឃៅដែលកំពុងបន្ត និងអំពើប្រល័យពូជសាសន៍ដែលប្រព្រឹត្តដោយអ៊ីស្រាអែល ប្រឆាំងនឹងប្រជាជនប៉ាឡេស្ទីននៅដែនដីហ្កាហ្សា"។

អ៊ីស្រាអែលតែងច្រានចោលការចោទប្រកាន់ណាមួយពីអំពើប្រល័យពូជសាសន៍ ដោយនិយាយថា ខ្លួនបានគោរពច្បាប់អន្តរជាតិ និងមានសិទ្ធិការពារខ្លួន បន្ទាប់ពីការវាយប្រហារឆ្លងព្រំដែនរបស់ពួកសកម្មប្រយុទ្ធហាម៉ាស ពីតំបន់ហ្កាហ្សា កាលពីថ្ងៃទី០៧ ខែតុលា ឆ្នាំ២០២៣ ដែលជំរុញឱ្យមានសង្រ្គាមហ្កាហ្សាចុងក្រោយនេះ៕