ប្រធានាធិបតីម៉ិកស៊ិក លោកស្រី ក្លៅឌៀ សេនបោម(Claudia Sheinbaum) បាននិយាយកាលពីថ្ងៃពុធ (១៦ មេសា) ថា ម៉ិកស៊ិកនឹងមិនបន្តទំនាក់ទំនងការទូតជាមួយប្រទេសអេក្វាឌ័រឡើយ ដរាបណាប្រធានាធិបតីអេក្វាឌ័រ លោក Daniel Noboa នៅតែកាន់តំណែង។

ភាពប្រេះឆាគឺបណ្តាលមកពីការវាយឆ្មក់របស់ប្រទេសអេក្វាឌ័រចូលស្ថានទូតម៉ិកស៊ិក ក្នុងទីក្រុង Quito កាលពីខែមេសា ឆ្នាំ២០២៤ ដែលក្រោយមកប្រទេសម៉ិកស៊ិក បានកោះហៅអ្នកការទូតរបស់ខ្លួនពីប្រទេសនៅអាមេរិកខាងត្បូងមួយនេះ។

អតីតអនុប្រធានាធិបតីអេក្វាឌ័រ លោក Jorge Glas ដែលត្រូវបានចោទប្រកាន់ពីបទពុករលួយ បានរស់នៅក្នុងស្ថានទូតម៉ិកស៊ិកតាំងពីខែធ្នូ ឆ្នាំ២០២៣ ហើយទទួលបានសិទ្ធិជ្រកកោនផ្នែកការទូតភ្លាមៗ មុនពេលនគរបាលអេក្វាឌ័រសម្រុកចូលស្ថានទូតម៉ិកស៊ិក ហើយនាំខ្លួនលោកទៅកាន់មន្ទីរឃុំឃាំង។

ប្រទេសអេក្វាឌ័រ នៅពេលនោះបានអះអាងថាការផ្តល់សិទ្ធិជ្រកកោនគឺខុសច្បាប់ ព្រោះនៅក្រោមច្បាប់អន្តរជាតិ អ្នកដែលប្រឈមការចោទប្រកាន់ នឹងមិនត្រូវបានផ្តល់សិទ្ធិជ្រកកោនឡើយ។

លោកស្រី Sheinbaum បានគាំទ្រជាសាធារណៈនូវគូប្រជែងរបស់ លោក Noboa គឺលោកស្រី Luisa Gonzalez ដែលបានអំពាវនាវឱ្យមានការរាប់សន្លឹកឆ្នោតឡើងវិញ ប៉ុន្តែសំណើរបស់លោកស្រី ត្រូវបានបដិសេធដោយក្រុមអ្នកឃ្លាំមើលការបោះឆ្នោត។