ប្រធានាធិបតីអាមេរិក លោក ដូណាល់ ត្រាំ បានបន្តការហាមប្រាមលើនាវាដែលដាក់ទង់ជាតិរុស្ស៊ី ឬពាក់ព័ន្ធជាមួយរុស្ស៊ី នៅក្នុងកំពង់ផែសហរដ្ឋអាមេរិក រយៈពេលមួយឆ្នាំទៀត។ នេះបើយោងតាមឯកសាររបស់សេតវិមានដែលបានបោះពុម្ពផ្សាយក្នុងទស្សនាវដ្តីសហព័ន្ធអាមេរិក។

យោងតាមឯកសារនេះ ភាពអាសន្នជាតិទាក់ទងនឹងសហព័ន្ធរុស្ស៊ី និងអំណាចគ្រាអាសន្នដែលមានចែងក្នុងសេចក្តីប្រកាសលេខ ១០៣៧១ដើម្បីគ្រប់គ្រង «ការចូលចតនិងការចល័តរបស់នាវាដែលពាក់ព័ន្ធជាមួយរុស្ស៊ី នៅកំពង់ផែនៅសហរដ្ឋអាមេរិក» ត្រូវបានបន្តសម្រាប់រយៈពេលមួយឆ្នាំទៀត។

យោងតាមសេចក្តីថ្លែងការណ៍ គោលនយោបាយ និងសកម្មភាពរបស់រដ្ឋាភិបាលរុស្ស៊ី បន្តបង្កើតភាពអាសន្នសម្រាប់ទីក្រុងវ៉ាស៊ីនតោន ដោយការបង្កគ្រោះថ្នាក់ ឬគំរាមកំហែងដល់ទំនាក់ទំនងអន្តរជាតិរបស់សហរដ្ឋអាមេរិក។

ការហាមឃាត់ជាបន្តបន្ទាប់នេះ ត្រូវបានដាក់ចេញដោយអតីតប្រធានាធិបតីអាមេរិក លោកចូ បៃដិន (Joe Biden) នៅថ្ងៃទី ២១ ខែមេសា ឆ្នាំ ២០២២។