ប្រទេសទាំងពីរ បាននិយាយកាលពីថ្ងៃពុធ បន្ទាប់ដំណើរទស្សនកិច្ចផ្លូវការលើកដំបូងរបស់ប្រធានាធិបតីលីបង់លោក Joseph Aoun ទៅកាន់រដ្ឋឈូងសមុទ្រនេះថា  ប្រទេសកាតា នឹងបន្តផ្តល់ជំនួយចំនួន ៦០ លានដុល្លារដើម្បីបើកប្រាក់ខែដល់កងទ័ពលីបង់ និងផ្តល់រថយន្តយោធាចំនួន ១៦២គ្រឿង។

សេចក្តីថ្លែងការណ៍រួម បានឲ្យដឹងថា មេដឹកនាំប្រទេសកាតា លោក Sheikh Tamim bin Hamad Al-Thani «បានប្រកាសពីការបន្តផ្តល់ជំនួយរបស់ប្រទេសនេះ ដើម្បីគាំទ្រប្រាក់ខែដល់កងទ័ពលីបង់ចំនួន ៦០លានដុល្លារអាមេរិក ជាការបន្ថែមពីលើរថយន្តយោធា ១៦២គ្រឿង»។

លោកបានបន្ថែមថា លក្ខខណ្ឌ គឺដើម្បីឲ្យកងទ័ពលីបង់ «បំពេញភារកិច្ចជាតិរបស់ខ្លួន ក្នុងការរក្សាស្ថិរភាព និងការគ្រប់គ្រងព្រំដែននៃទឹកដីលីបង់ទាំងមូល»។

លោក Aoun ដែលត្រូវបានបោះឆ្នោតជ្រើសរើសកាលពីខែមករា បន្ទាប់ពីរដ្ឋាភិបាលចាំផ្ទះជាងពីរឆ្នាំ នៅក្នុងទីក្រុង Beirut ត្រូវបានប្រគល់ភារកិច្ច ឲ្យរៀបចំផែនការមួយចេញពីវិបត្តិសេដ្ឋកិច្ចដ៏អាក្រក់បំផុតរបស់ប្រទេសនេះ និងការកសាងឡើងវិញ បន្ទាប់ពីសង្គ្រាមដ៏រ៉ាំរ៉ៃរវាងអ៊ីស្រាអែល និងក្រុមហេសបូឡា។

ទីភ្នាក់ងារព័ត៌មានផ្លូវការរបស់ប្រទេសកាតា បានរាយការណ៍ថា លោកប្រធានាធិបតីលីបង់ បានមកដល់ប្រទេសកាតាកាលពីថ្ងៃអង្គារ អមដោយរដ្ឋមន្ត្រីការបរទេសលោក Youssef Raggi ហើយបានចាកចេញពីទីក្រុងដូហា កាលពីរសៀលថ្ងៃពុធ។