កាលពីថ្ងៃពុធម្សិលមិញ អ៊ុយក្រែន បានចោទប្រកាន់រុស្ស៊ីថាបានបើកការវាយប្រហារជាង ៣០លើកលើហេដ្ឋារចនាសម្ព័ន្ធថាមពលរបស់ខ្លួន ចាប់តាំងពីភាគីទាំង ២ បានឯកភាពកាលពីខែមីនា ដើម្បីផ្អាកការវាយប្រហារលើគោលដៅបែបនេះ ។

ថ្លែងក្នុងសន្និសីទសារព័ត៌មាននៅទីក្រុងគីវ អ្នកនាំពាក្យក្រសួងការបរទេសអ៊ុយក្រែនលោក Heorhii Tykhyi និយាយថា អ៊ុយក្រែននៅគោរពតាមការផ្អាកការវាយប្រហាររៀបចំឡើងដោយសហរដ្ឋអាមេរិក ដែលភាគីទំាង ២ បានចោទប្រកាន់គ្នាទៅវិញទៅមកថា ពួកគេបានបំពានដូចគ្នា ។

លោក Tykhyi បាននិយាយផងដែរថា អ៊ុយក្រែននៅបន្តទាក់ទងជាមួយទីក្រុងប៉េកាំង ចំពោះជនជាតិចិន ២នាក់ដែលត្រូវបានចាប់ខ្លួនធ្វើជាអ្នកទោសនៅតំបន់ភាគខាងកើតអ៊ុយក្រែន ខណៈធ្វើសង្រ្គាមឲ្យកងទ័ពរុស្ស៊ី ។

លោកបន្តថា កាលពីសប្តាហ៍មុន អ៊ុយក្រែន បានកោះហៅមន្រ្តីការទូតចិនម្នាក់ ដើម្បីពិភាក្សាលើបញ្ហាមួយនេះ ដែលអាចធ្វើប៉ះពាល់ដល់ទំនាក់ទំនងទ្វេភាគី ។

ពាក់ព័ន្ធនឹងកិច្ចព្រមព្រៀងរ៉ែជាមួយសហរដ្ឋអាមេរិក លោក Tykhyi និយាយថា អ៊ុយក្រែនបន្តឆ្ពោះទៅមុខជាមួយអនុស្សរណៈឆាប់រហ័ស ៕