កាសែត Bloomberg News បានរាយការណ៍ដោយលើកប្រភពមនុស្សជំនិតនឹងបញ្ហានេះថា ចិនបានបញ្ជាឲ្យក្រុមហ៊ុនអាកាសចរណ៍ មិនត្រូវទទួលយកការចែកចាយយន្តហោះ Boeing BA.N បន្ថែមទៀតនោះទេ ជាការឆ្លើយតបនឹងការសម្រេចចិត្តរបស់សហរដ្ឋអាមេរិក ក្នុងការដំឡើងពន្ធ ១៤៥ភាគរយលើទំនិញចិន ។

ភាគហ៊ុនរបស់ក្រុមហ៊ុន Boeing ដែលចាត់ទុកចិនថាស្ថិតក្នុងចំណោមទីផ្សារកំណើនធំបំផុតរបស់ខ្លួន និងជាទីដែលក្រុមហ៊ុនប្រជែង Airbus AIR.PA ឈរលើទីតាំងលេចធ្លោនោះ បានធ្លាកចុះ ២ភាគរយ នៅក្នុងការជួញដូរមុននេះ ។

ក្រុមហ៊ុនអាកាសចរណ៍កំពូលៗចំនួន ៣របស់ចិន គឺក្រុមហ៊ុន Air China, China Eastern Airlines និងក្រុមហ៊ុន China Southern Airlines គ្រោងទទួលយកការចែកចាយយន្តហោះ Boeing ចន្លោះឆ្នាំ ២០២៥-២០២៧ ។

កាសែត Bloomberg រាយការណ៍ថា ទីក្រុងប៉េកាំង បានស្នើសុំផងដែរឲ្យក្រុមហ៊ុនដឹកជញ្ជូនចិន ផ្អាកការទិញសម្ភារៈពាក់ព័ន្ធនឹងយន្តហោះ និងគ្រឿងបង្គុំពីក្រុមហ៊ុនសហរដ្ឋអាមេរិក ។

វិធានការរបស់ចិនក្នុងការផ្អាកការទិញសមាសធាតុទាក់ទងនឹងយន្តហោះ ត្រូវបានគេរំពឹងថា នឹងធ្វើឲ្យថ្លៃថែទាំហក់ឡើងខ្ពស់សម្រាប់យន្តហោះដែលហោះហើរក្នុងប្រទេស ។

វិធានការរបស់ទីក្រុងប៉េកាំង បានកើតមានបន្ទាប់ពីការសម្រេចចិត្តកាលពីសប្តាហ៍មុន ដើម្បីបង្កើនពន្ធនាំចូលរបស់សហរដ្ឋអាមេរិកដល់ ១២៥ភាគរយ ជាការសងសឹកនឹងការដំឡើងពន្ធរបស់សហរដ្ឋអាមរិក ដែលនឹងធ្វើឲ្យកើនឡើងការចំណាយលើយន្តហោះ Boeing សម្រាប់ក្រុមហ៊ុនដឹកជញ្ជូនចិន ៕