​អាមេរិក៖ មន្ត្រី​ក្រសួងសុខាភិបាល​សហរដ្ឋ​អាមេរិក​បាន​និយាយ​កាលពី​ថ្ងៃអាទិត្យ​ថា វីរុស​​បម្លែង​ខ្លួនថ្មី Omicron បាន​ឆ្លង​រាលដាល​ដល់​រដ្ឋប្រមាណ​មួយ​ភាគ​បី​របស់​សហរដ្ឋអាមេរិក ប៉ុន្តែ​វីរុស​​បម្លែង​ខ្លួន ​Delta នៅតែ​លើស​លប់​នៃ​ករណី​ឆ្លង​វីរុស COVID-19 ខណៈ​ករណី​កើនឡើង​​នៅ​ទូទាំង​ប្រទេស​។

ទោះបីជា​ការ​លេច​ឡើង​នៃ​វីរុស​​បម្លែង​ខ្លួន​ថ្មី​ បាន​បង្ក​ឱ្យ​មានការ​ភ្ញាក់​ផ្អើល​ទូទាំង​ពិភពលោក​ក៏ដោយ វេជ្ជបណ្ឌិត​លោក Anthony Fauci មន្ត្រី​ជំងឺឆ្លង​របស់​សហរដ្ឋ​អាមេរិក​បាន​និយាយ​ថា រហូតមកដល់​ពេលនេះ​វា​ហាក់​ដូច​ជា​មិន​មាន​កម្រិត​នៃ​ភាព​ធ្ងន់ធ្ងរ ​ចំពោះ​វីរុស​នេះ​នោះ​ទេ ប៉ុន្តែ​យើង​ត្រូវការការសិក្សា​បន្ថែម​ទៀត​។ លោក Fauci បាន​និយាយ​ថា លោក​ក៏​សង្ឃឹមថា ​សហរដ្ឋអាមេរិក​នឹង​លុប​ចោល​បម្រាម​របស់​ខ្លួន​លើ​អ្នកដំណើរ​ មកពី​បណ្តា​ប្រទេស​អាហ្វ្រិក​ខាងត្បូង​ក្នុង​រយៈ​ពេល​សម​ស្រប​ណាមួយ​។ រដ្ឋាភិបាល​ប្រទេស​អាហ្វ្រិក​ខាងត្បូងបាន​ត្អូញត្អែរ​ថា ​ខ្លួន​កំពុង​ត្រូវ​បានដាក់​ទណ្ឌកម្ម​ជុំវិញ​ការ​រក​ឃើញ​វីរុស​​បម្លែង​ខ្លួន​ថ្មី​។

យ៉ាងហោចណាស់​រដ្ឋ​ចំនួន​ ១៧ របស់​សហរដ្ឋ​អាមេរិក​បាន​រាយការណ៍​អំពី​ករណី​វីរុស​​បម្លែង​ខ្លួន​ថ្មី​ Omicron​។ ករណី​ជាច្រើន​ស្ថិត​ក្នុងចំណោម​អ្នក​ដែល​បាន​ចាក់​វ៉ាក់សាំង​ពេញលេញមាន​រោគសញ្ញា​ស្រាល ទោះបីជា​ស្ថានភាព​នៃ​ការ​ចាក់​វ៉ាក់សាំង​ដូ​ស​ជំរុញរបស់​អ្នកជំងឺមួយ​ចំនួន​មិន​ត្រូវ​បាន​រាយការណ៍​ក៏ដោយ​។ ទោះបី​ជា​មាន​ករណី​វីរុស​​បម្លែង​ខ្លួន​ថ្មី Omicron រាប់​សិប​ករណី​ក៏ដោយក៏​វីរុស​បម្លែង​ខ្លួន​ Delta​ នៅ​តែ​មាន​ចំនួន​ ៩៩.៩​% នៃ​ករណី​វីរុស​ COVID ​នៅក្នុង​សហរដ្ឋ​អា​មេរិ​ក​។ សហរដ្ឋអាមេរិក​ក្នុង​រយៈពេល​ ៧ថ្ងៃ​ចុង​ក្រោយនេះ​ជា​មធ្យមមាន​ករណី​ថ្មី​ចំនួន ១១៩,០០០​ករណី​ក្នុង​មួយថ្ងៃ និង​បាន​បាត់​បង់ជីវិត​ជិត ១,៣០០​នាក់​ដោយ​សារ​វីរុស COVID-19 ជា​រៀងរាល់ថ្ងៃ​៕

អត្ថបទ៖ ប៊ុនថន