ប្រមុខធនាគារពិភពលោក លោក Ajay Banga កាលពីថ្ងៃពុធ (ទី១៦ ខែមេសា) បាននិយាយថា លោកបានពិភាក្សាក្នុងន័យស្ថាបនាជាមួយរដ្ឋបាលរបស់លោកប្រធានាធិបតី Donald Trump អំពីស្ថាប័នផ្តល់កម្ចីអភិវឌ្ឍន៍ ប៉ុន្តែលោកមិនដឹងថា តើសហរដ្ឋអាមេរិកនឹងផ្តល់វិភាគទានកម្រិតណានោះទេដល់មូលនិធិរបស់ធនាគារ សម្រាប់ប្រទេសក្រីក្របំផុតរបស់ពិភពលោក។

លោក Banga បានប្រាប់អ្នកសារព័ត៌មានថា ប្រសិនបើសហរដ្ឋអាមេរិកមិនបានធ្វើតាមការសន្យា ក្នុងការផ្ដល់ឲ្យសមាគមអភិវឌ្ឍន៍អន្តរជាតិ (IDA) ចំនួន ៤ពាន់លានដុល្លារ ដែលជាការសម្រេចរបស់រដ្ឋបាលនៃអតីតប្រធានាធិបតី លោក Joe Biden កាលពីឆ្នាំមុន ហើយដោយប្រទេសមួយចំនួន នៅអឺរ៉ុប បានកាត់បន្ថយមូលនិធិដែលបានសន្យាផ្ដល់ឲ្យ វាអាចកាត់បន្ថយមូលនិធិចុងក្រោយរបស់ IDA ចំនួន ១០០ពាន់លានដុល្លារមកនៅ ៨០ពាន់លានដុល្លារ ឬ ៨៥ពាន់លានដុល្លារ។

មួយសប្តាហ៍មុនមានកិច្ចប្រជុំនិទាឃរដូវរបស់ធនាគារពិភពលោក និងមូលនិធិរូបិយវត្ថុអន្តរជាតិ នៅទីក្រុងវ៉ាស៊ីនតោន លោក Banga បានប្រាប់ថា៖ «យើងកំពុងមានកិច្ចសន្ទនាប្រកបដោយការស្ថាបនាជាមួយរដ្ឋបាលសហរដ្ឋអាមេរិក។ ខ្ញុំមិនដឹងថា វានឹងបញ្ចប់ទៅក្នុងលទ្ធផលបែបណាឡើយ ប៉ុន្តែខ្ញុំមិនមានបញ្ហាអ្វីនោះទេជាមួយកិច្ចសន្ទនាដែលខ្ញុំកំពុងមាននេះ»។

នៅពេលត្រូវបានសួរថា តើរូបលោកនៅតែប្តេជ្ញាចិត្ត ចំពោះគោលដៅរបស់ធនាគារពិភពលោក ក្នុងការដក ៤៥ភាគរយនៃហិរញ្ញប្បទានប្រចាំឆ្នាំរបស់ខ្លួនទៅបញ្ចូលក្នុងគម្រោងដែលទាក់ទងនឹងអាកាសធាតុ នៅឆ្នាំនេះ ដើម្បីទប់ទល់នឹងគោលដៅរបស់ប្រធានាធិបតី លោក Trump ក្នុងការកាត់បន្ថយការផ្តល់មូលនិធិអាកាសធាតុនោះ លោក Banga បានឆ្លើយថា គម្រោងជាច្រើនដែលរួមបញ្ចូលក្នុងគោលដៅនោះ នឹងគ្រាន់តែជា «ការអភិវឌ្ឍន៍ឆ្លាតវៃ» ដែលមានអត្ថប្រយោជន៍ដល់អាកាសធាតុប៉ុណ្ណោះ៕