យោងតាមការអះអាងរបស់ទីភ្នាក់ងារការពារជនស៊ីវិលតំបន់ហ្កាហ្សា បានឲ្យដឹងថា រលកនៃការវាយប្រហារតាមច្រកអាកាសរបស់អ៊ីស្រាអែល ត្រូវចំជំរំសំពត់តង់ជាច្រើនសម្រាប់ជនប៉ាឡេស្ទីនជម្លៀសខ្លួននៅទូទាំងតំបន់ហ្កាហ្សាស្រ្ទីប ក្នុងរយៈពេល ២៤ម៉ោងកន្លងមកនេះ ដោយបានសម្លាប់មនុស្សរាប់សិបនាក់ ។

លោក Mahmud Bassal គឺជាអ្នកនាំពាក្យទីភ្នាក់ងារការពារជនស៊ីវិលតំបន់ហ្កាហ្សា និយាយថា គោលដៅវាយប្រហារកាលពីយប់កន្លងទៅរបស់អ៊ីស្រាអែល រួមទាំងសំពត់តង់ជាច្រើនកន្លែងនៅតំបន់ al-Mawasi ស្ថិតក្នុងទីក្រុងភាគខាងត្បូង Khan Younis ។

លោក Bassal បាននិយាយប្រាប់ទីភ្នាក់ងារព័ត៌មាន AFPថា ទុរក្កបុគ្គលយ៉ាងហោច ១៦នាក់ ត្រូវបានសម្លាប់ ដែលភាគច្រើននៃពួកគេគឺជាស្រ្តី និងកុមារ ហើយមនុស្ស ២៣នាក់ផ្សេងទៀត រងរបួស បន្ទាប់ពីការវាយប្រហារមីស៊ីល ២គ្រាប់របស់អ៊ីស្រាអែលលើសំពត់តង់ជាច្រើន ដែលជាកន្លែងស្នាក់នៅរបស់គ្រួសារជម្លៀសខ្លួននៅតំបន់ al-Mawasi ។

លោក Bassal បន្តថា តំបន់ al-Mawasi ត្រូវបានកំណត់ដោយអ៊ីស្រាអែលថាជាតំបន់មនុស្សធម៌ ។ មនុស្ស ៧នាក់ផ្សេងទៀត ត្រូវបានសម្លាប់នៅក្នុងការវាយប្រហារមួយលើសំពត់តង់នៅទីក្រុងភាគខាងជើង Beit Lahiya ខណៈការវាយប្រហារមួយផ្សេងទៀតនៅជិតតំបន់ al-Mawasi បានសម្លាប់ឪពុកម្នាក់ និងកូនប្រុសរបស់គាត់ដែលរស់នៅក្នុងសំពត់តង់ ៕