ទាហានអាមេរិករាប់ម៉ឺននាក់ដែលឈរជើងនៅកូរ៉េខាងត្បូង និងជប៉ុន ទំនងក្លាយជាផ្នែកមួយនៃដំណើរការចរចារបញ្ហាពន្ធរបស់លោកប្រធានាធិបតី Donald Trump បើទោះបីជាមានការប្រឹងប្រែងពីប្រទេសទាំង២ ក្នុងការញែកការចរចាសន្តិសុខចេញពីពាណិជ្ជកម្មក៏ដោយ។

តាមរយៈការបង្ហោះនៅលើបណ្ដាញសង្គម Truth Social លោក Trump បានប្រាប់ថា ការចែករំលែកការចំណាយលើវិស័យការពារជាតិ នឹងជាផ្នែកមួយនៃការចរចា «កិច្ចព្រមព្រៀងតែមួយ» ជាមួយទីក្រុងសេអ៊ូល ទោះបីជាលោកបានលើកឡើងពីបញ្ហានៃបន្ទុកការពារជាតិ អំឡុងពេលមានទស្សនកិច្ចរបស់មន្ត្រីជប៉ុន នៅទីក្រុងវ៉ាស៊ីនតោនក្នុងសប្តាហ៍នេះក៏ដោយ។

គួរបញ្ជាក់ថា ជប៉ុនមានទាហានអាមេរិកប្រហែល ៥០.០០០នាក់ ហើយកូរ៉េខាងត្បូង ២៨.៥០០នាក់។ ប្រទេសទាំង២ ពឹងផ្អែកលើឆ័ត្រនុយក្លេអ៊ែររបស់សហរដ្ឋអាមេរិក ដើម្បីការពារទប់ទល់នឹងប្រទេសចិន រុស្ស៊ី និងកូរ៉េខាងជើង ហើយត្រូវបានគេមើលឃើញថា មានសារៈសំខាន់សម្រាប់សមត្ថភាពយោធារបស់សហរដ្ឋអាមេរិក ក្នុងប៉ាន់ស្មានអំពីកម្លាំង និងឥទ្ធិពល នៅជុំវិញតំបន់។

លោក Trump ធ្លាប់បានលើកឡើងនៅមុននេះថា លោកអាចដកកងកម្លាំងអាមេរិកចេញ ប្រសិនបើប្រទេសទាំងនោះ មិនបង់ប្រាក់ ហើយក្នុងអំឡុងពេលអាណត្តិដំបូងរបស់លោក ប្រាក់រាប់ពាន់លានដុល្លារបន្ថែមទៀតត្រូវបានទាមទារ៕