ក្រុមឆ្មាំល្បាតឆ្នេរហ្វីលីពីន(PCG) និយាយនៅថ្ងៃព្រហស្បតិ៍នេះថា មនុស្ស ៤នាក់ រួមទាំងជនជាតិចិនម្នាក់ បានស្លាប់ និងមនុស្ស ៧នាក់ផ្សេងទៀត កំពុងបាត់ខ្លួននៅជិតខេត្តភាគខាងលិច Occidental Mindoro ក្រោយនាវាបូមខ្សាច់ដឹកមនុស្ស ២៥នាក់ បានលិចកាលពីរយៈពេល ២ថ្ងៃមុន ។

PCG និយាយនៅក្នុងសេចក្តីថ្លែងការណ៍ថា នាវាមូលខ្សាច់ MV Hong Hai 16 មានផ្ទុកប្រេងរំអិល ២ពាន់លីត្រ និងប្រេងម៉ាស៊ូត ៣ម៉ឺនលីត្រ ពេលវាលិចកាលពីថ្ងៃទី ១៥ ខែមេសានៅក្នុងដែនទឹកជិតខេត្ត Occidental Mindoro ក្នុងនោះកិច្ចខិតខំប្រឹងប្រែងទប់ស្កាត់ បានធ្វើឡើងដើម្បីការពារកំពប់ប្រេង ។

PCG បន្តទៀតថា នៅថ្ងៃព្រហស្បតិ៍នេះ ក្រុមមុជទឹក បានរកឃើញសាកសពមនុស្ស ២នាក់បន្ថែមទៀត អំឡុងប្រតិបត្តិការជួយសង្រ្គោះ និងរុករក ធ្វើឲ្យចំនួនមនុស្សស្លាប់កើនឡើងដល់ ៤នាក់ ។

ពួកគេបន្តថា មានសមាជិកនាវិកជនជាតិហ្វីលីពីន ១៣នាក់ និងជនជាតិចិន ១២នាក់នៅលើនាវា ហើយជនជាតិហ្វីលីពីន ៦នាក់ និងជនជាតិចិន ៨នាក់ ត្រូវបានជួយសង្រ្គោះ ៕