សភារបស់ប្រទេសម៉ុលដាវី នៅថ្ងៃព្រហស្បតិ៍ (ទី១៧ ខែមេសា) នេះ បានបោះឆ្នោត ដើម្បីឲ្យមានការរៀបចំការបោះឆ្នោតសភា ក្នុងខែកញ្ញា ជាការព្រឹត្តិការណ៍មួយដែលត្រូវបានគេរំពឹងថា នឹងមានការប្រកួតប្រជែងយ៉ាងស្ថិតស្វាញ ហើយអាចកាត់បន្ថយចំនួនអាសនៈដែលគ្រប់គ្រងដោយគណបក្ស PAS របស់លោកស្រីប្រធានាធិបតី Maia Sandu ដែលគាំទ្រលោកខាងលិច។

លោកស្រី Sandu កំពុងប្រឹងប្រែងនាំយកប្រទេសម៉ុលដាវីចូលទៅក្នុងសហភាពអឺរ៉ុប ហើយផ្ដាច់ចេញពីទីក្រុងមូស្គូ ដែលពីមុនបានគ្រប់គ្រងប្រទេសដ៏តូចនៅអឺរ៉ុបខាងកើតមួយនេះ ដែលស្ថិតនៅចន្លោះអ៊ុយក្រែន និងរ៉ូម៉ានី។

អតីតអគ្គរដ្ឋអាជ្ញា លោក Alexander Stoianoglo ដែលស្ទើរតែបានយកឈ្នះលោកស្រីប្រធានាធិបតី Sandu កាលពីឆ្នាំមុននោះ កំពុងដឹកនាំក្រុមចម្រុះដែលមានគណបក្សចំនួន៣ ដើម្បីប្រជែងយកសំឡេងភាគច្រើនពីគណបក្ស PAS។

លោក Stoianoglo បានបរាជ័យក្នុងសំឡេងយ៉ាងស្ដួចស្ដើង នៅក្នុងការបោះឆ្នោតជុំទី២ បន្ទាប់ពីមានយុទ្ធនាការ ដែលបានថ្លឹងថ្លៃងឲ្យមានតុល្យភាពនូវគោលនយោបាយការបរទេស រវាងរុស្ស៊ី និងបណ្ដាប្រទេសលោកខាងលិច។

សមាជិកសភាចំនួន ៥៧នាក់ នៅថ្ងៃព្រហស្បតិ៍ បានគាំទ្រញត្តិ ដើម្បីឲ្យមានរៀបចំការបោះឆ្នោត នៅថ្ងៃទី២៨ ខែកញ្ញា ខណៈពេលដែល ៣២រូប បានផ្ដល់សំឡេងអនុបវាទ៕