ប្រធានាធិបតីអាមេរិក លោក Donald Trump នៅថ្ងៃព្រហស្បតិ៍ (ទី១៧ ខែមេសា) នេះ ធ្វើជាម្ចាស់ផ្ទះទទួលនាយករដ្ឋមន្ត្រីអ៊ីតាលីដែលជាសម្ព័ន្ធមិត្តជិតស្និទ្ធរបស់លោក គឺលោកស្រី Giorgia Meloni ដែលចង់ធ្វើតួនាទីជាអ្នកសម្របសម្រួលដ៏មានឥទ្ធិពល រវាងទីក្រុងវ៉ាស៊ីនតោន និងអឺរ៉ុប ចំពេលមានភាពតានតឹង ជុំវិញអត្រាពន្ធគយរបស់សហរដ្ឋអាមេរិក។

សហភាពអឺរ៉ុប (EU) ដែលមានសមាជិក ២៧ប្រទេស ប្រឈមនឹងអត្រាពន្ធនាំចូល ២៥ភាគរយ លើដែកថែប និងអាលុយមីញ៉ូម រួមជាមួយរថយន្ត ហើយពន្ធបន្ថែមលើទំនិញស្ទើរតែទាំងអស់ ក្រោមគោលនយោបាយរបស់លោក Trump ចំពោះបណ្ដាប្រទេសដែលលោកចាត់ទុកថា បានដាក់របាំងខ្ពស់ ចំពោះការនាំចូលរបស់សហរដ្ឋអាមេរិក។

លោកស្រី Meloni អ្នកនយោបាយអភិរក្សវ័យ ៤៨ឆ្នាំដែលលោក Trump បានផ្ដល់ការស្វាគមន៍យ៉ាងកក់ក្តៅ គឺជាមេដឹកនាំ EU តែម្នាក់គត់ ដែលត្រូវបានអញ្ជើញឲ្យចូលរួមពិធីស្បថឡើងកាន់តំណែងរបស់លោក Trump កាលពីខែមករា។ ចំណាត់ការរបស់លោក Trump ក្នុងការផ្អាកការអនុវត្តពន្ធគយជាសកលដោយភាគច្រើនរយៈពេល ៩០ថ្ងៃ កាលពីសប្តាហ៍មុន បានបន្ធូរបន្ថយសម្ពាធមួយចំនួនលើលោកស្រី Meloni។

កិច្ចប្រជុំរបស់មេដឹកនាំទាំង២ នឹងធ្វើឡើងមួយថ្ងៃមុនពេលលោកស្រីធ្វើជាម្ចាស់ផ្ទះស្វាគមន៍អនុប្រធានាធិបតី លោក JD Vance នៅទីក្រុងរ៉ូម។ កិច្ចពិភាក្សាជាបន្តបន្ទាប់ទាំងនេះ អាចមានសារៈសំខាន់ក្នុងការកំណត់ថា តើលោកស្រីអាចដើរតួជាអ្នកសម្រុះសម្រួល រវាងសហរដ្ឋអាមេរិក និងអឺរ៉ុបបានដែរ ឬយ៉ាងណា៕