ឯកសារមួយច្បាប់មើលឃើញដោយទីភ្នាក់ងារព័ត៌មានរ៉យទ័រ បានបង្ហាញថា រុស្ស៊ី បានរៀបចំគម្រោងជាច្រើនដើម្បីប្រើប្រាស់ក្រុមហ៊ុនអាហាររបស់អាមេរិកមួយ ដែលវិមានក្រឹមឡាំងបានរឹបអូស ហើយដាក់នៅក្រោមការគ្រប់គ្រងរបស់រដ្ឋ ដើម្បីប្រើយកទៅផ្គត់ផ្គង់ស្បៀងដល់កងទ័ពទីក្រុងមូស្គូ។

ខណៈដែលសហរដ្ឋអាមេរិក និងវិមានក្រឹមឡាំង កំពុងចរចាបញ្ឈប់សង្គ្រាមអ៊ុយក្រែន ក្រុមហ៊ុនផលិតអាហារកំប៉ុងមួយឈ្មោះថា Glavprodukt ដែលត្រូវបានរឹបអូសកាលពីខែតុលា និងជាក្រុមហ៊ុនរបស់អាមេរិកតែមួយគត់ដែលត្រូវរឹបអូសឱ្យស្ថិតក្រោមការគ្រប់គ្រងរបស់រដ្ឋ កំពុងស្ថិតក្នុងស្ថានភាពទាល់ច្រក។

រដ្ឋមន្ត្រីការបរទេសអាមេរិក លោក Marco Rubio បាននិយាយថា បញ្ហារបស់ក្រុមហ៊ុននោះនឹងក្លាយជាផ្នែកមួយនៃកិច្ចសន្ទនាអំពីការកំណត់ឡើងវិញនូវទំនាក់ទំនងរវាងអាមេរិក និងរុស្ស៊ី។

លិខិតមួយដែលផ្ញើទៅកាន់រដ្ឋមន្រ្តីយុត្តិធម៌រុស្ស៊ី ស្ដីពីការគ្រប់គ្រងថ្មីលើក្រុមហ៊ុន Glavprodukt នេះបានបង្ហាញថា ការរឹបអូសយកស្ថាប័ននេះគឺចាំបាច់ដើម្បីធានានូវការផលិតស្បៀងអាហារមានស្ថេរភាព រួមទាំងការផ្គត់ផ្គង់នាពេលអនាគតដល់ឆ្មាំជាតិ និងក្រសួងការពារជាតិ។

គួឱ្យដឹងថា បណ្ដាញបុត្រសម្ព័ន្ធរបស់ក្រុមហ៊ុនអឺរ៉ុបជាង ១០ស្ថាប័ន ត្រូវបានរឹបអូសនៅរុស្ស៊ី ដោយក្រឹត្យរបស់ប្រធានាធិបតី ជុំវិញការចោទប្រកាន់ជាច្រើន រួមទាំងក្រុមហ៊ុនផលិតស្រាបៀរដាណឺម៉ាក Carlsberg និងក្រុមហ៊ុនហ្វាំងឡង់ Fortum ហើយវិមានក្រឹមឡាំង បានព្រមានអំពីការរឹបអូសទ្រព្យសម្បត្តិបន្ថែមទៀត៕