ទូរទស្សន៍របស់ក្រុមហ៊ួទី al-Masirah បានរាយការណ៍នៅថ្ងៃសុក្រនេះថា ការវាយប្រហារតាមអាកាសរបស់សហរដ្ឋអាមេរិកលើកំពង់ផែឥន្ធនៈ Ras Isa របស់ប្រទេសយេម៉ែន កាលពីថ្ងៃព្រហស្បតិ៍ បាន  បណ្តាលឲ្យមនុស្សយ៉ាងតិច៣៨នាក់ ស្លាប់ និង ១០២នាក់ រងរបួស។ 

ទូរទស្សន៍នេះ បានឲ្យដឹងថា ជនរងគ្រោះ គឺជាកម្មករ និងជាបុគ្គលិកកំពង់ផែ។

ក្រុមការពារជនស៊ីវិល និងជួយសង្គ្រោះ កំពុងធ្វើការពន្លត់អគ្គិភ័យដែលឆេះនៅកំពង់ផែ Ras Isa ហើយបញ្ជូនអ្នករងរបួស ទៅមន្ទីរពេទ្យ។

នាពេលកន្លង ទីបញ្ជាការកណ្តាលរបស់សហរដ្ឋអាមេរិក (USCENTCOM) បាននិយាយនៅក្នុងសេចក្តីថ្លែងការណ៍មួយថា ខ្លួនបានវាយប្រហារ និងបំផ្លាញកំពង់ផែ Ras Isa កាលពីថ្ងៃព្រហស្បតិ៍ «ដើម្បីលុបបំបាត់ប្រភពនៃឥន្ធនៈនេះនិង«ធ្វើឲ្យប្រភពសេដ្ឋកិច្ចរបស់ក្រុមហ៊ួទីចុះខ្សោយ។

មន្ត្រីរដ្ឋាភិបាលក្នុងតំបន់របស់ប្រទេសយេម៉ែន បានប្រាប់សារព័ត៌មានស៊ីនហួថា មានការវាយប្រហារ ៥លើកទៅលើកំពង់ផែនេះ ហើយបានធ្វើឲ្យវាខូចខាតដោយផ្នែក។

កាលពីពាក់កណ្តាលខែមីនា ប្រធានាធិបតីអាមេរិក លោក ដូណាល់ ត្រាំ (Donald Trump) បានបញ្ជាឲ្យកងទ័ពអាមេរិក ចាប់ផ្តើម«សកម្មភាពយោធាដ៏ម៉ឺងម៉ាត់ និងខ្លាំងក្លា» ប្រឆាំងនឹងក្រុមហ៊ួទី បន្ទាប់ពីពួកគេ បានប្រកាសពីផែនការរបស់ខ្លួន ក្នុងការបន្តការវាយប្រហារលើនាវាអ៊ីស្រាអែល នៅសមុទ្រក្រហម ដោយលើកឡើងពីការរាំងខ្ទប់ជំនួយរបស់អ៊ីស្រាអែលមិនឲ្យទៅដល់តំបន់ហ្កាហ្សា។