តុលាការកំពូលរបស់រុស្ស៊ី បានសម្រេចដកក្រុមតាលីបង់ចេញពីបញ្ជីអង្គការភេរវកម្មរបស់ប្រទេស និងផ្អាកការហាមឃាត់សកម្មភាពនានារបស់ពួកគេ។

តុលាការ បានចេញសេចក្តីសម្រេចកាលពីថ្ងៃព្រហស្បតិ៍ ដោយបានដកចេញការចាត់ទុកក្រុមតាលីបង់កាលពីឆ្នាំ ២០០៣ របស់រុស្ស៊ីថាជាអង្គការភេរវកម្ម។ ក្រុមតាលីបង់ បានគ្រប់គ្រងប្រទេសអាហ្វហ្គានីស្ថាន ចាប់តាំងពីពួកគេបានដំណ្តើមអំណាចមកវិញក្នុងខែសីហា ឆ្នាំ ២០២១។

បេសកជនពិសេសប្រធានាធិបតីរុស្ស៊ីប្រចាំប្រទេសអាហ្វហ្គានីស្ថាន លោក Zamir Kabulov បាននិយាយទៅកាន់ទីភ្នាក់ងារសារព័ត៌មានរដ្ឋ Tass ដោយលោកបាននិយាយថាសេចក្តីសម្រេចរបស់តុលាការបានដកចេញនូវឧបសគ្គផ្លូវច្បាប់ក្នុងការបង្កើតទំនាក់ទំនងនយោបាយនិងសេដ្ឋកិច្ចពេញលេញរវាងប្រទេសទាំងពីរ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីខែវិច្ឆិកា ឆ្នាំមុនថា ប្រទេសរបស់លោកសង្ឃឹមថានឹងកសាងទំនាក់ទំនងជាមួយអាហ្វហ្គានីស្ថាន។

ក្រុមអ្នកវិភាគបាននិយាយថា រដ្ឋបាលរបស់លោក ពូទីន បច្ចុប្បន្ននេះត្រូវបានគេរំពឹងថានឹងជំរុញទំនាក់ទំនងជាមួយក្រុមតាលីបង់លើវិធានការប្រឆាំងភេរវកម្ម។