លោក Rafael Grossi ប្រធានទីភ្នាក់ងារថាមពលបរមាណូអន្តរជាតិបាននិយាយកាលពីថ្ងៃព្រហស្បតិ៍ ១៧ មេសាសប្ដាហ៍នេះ ថា អង្គការឃ្លាំមើលនុយក្លេអ៊ែររបស់អង្គការសហប្រជាជាតិគួរតែដើរតួនាទីក្នុងកិច្ចចរចានុយក្លេអ៊ែររវាងទីក្រុងតេអេរ៉ង់ និងទីក្រុងវ៉ាស៊ីនតោន។

លោក Grossi ដែលបានទៅដល់ទីក្រុងតេអេរ៉ង់ កាលពីថ្ងៃពុធ ១៦ មេសា បានពិភាក្សាជាមួយរដ្ឋមន្ត្រីការបរទេសអ៊ីរ៉ង់លោក Abbas Araghchi អំពីរបៀបដែលទីភ្នាក់ងារ IAEA អាចគាំទ្រការចរចានុយក្លេអ៊ែរ អ៊ីរ៉ង់-អាមេរិក។ប្រធានាធិបតីអាមេរិក លោក Donald Trump បានគំរាមទម្លាក់គ្រាប់បែកលើអ៊ីរ៉ង់ ប្រសិនបើកិច្ចចរចាបរាជ័យ។

ថ្លែងជាមួយរដ្ឋមន្ត្រីការបរទេសអ៊ីរ៉ង់ លោក Araghchi លោក Grossi បានសង្កត់ធ្ងន់កាលពីថ្ងៃពុធអំពីសារៈសំខាន់នៃការដោះស្រាយបញ្ហាតាមមាគ៌ាការទូត ។

ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិបាននិយាយកាលពីថ្ងៃព្រហស្បតិ៍ថា ការពិភាក្សារវាងអ៊ីរ៉ង់ និងសហរដ្ឋអាមេរិក ជុំវិញកម្មវិធីនុយក្លេអ៊ែរដែលកំពុងរីកចម្រើនយ៉ាងឆាប់រហ័សរបស់ទីក្រុងតេអេរ៉ង់គឺ "ស្ថិតក្នុងដំណាក់កាលសំខាន់ណាស់"។

កាលពីឆ្នាំ ២០១៨លោក Trump បានដកសហរដ្ឋអាមេរិកចេញពីកតិកាសញ្ញានុយក្លេអ៊ែរឆ្នាំ២០១៥ រវាងអ៊ីរ៉ង់ និងមហាអំណាចពិភពលោក ដែលនាំឱ្យអ៊ីរ៉ង់ដើរលើសពីដែនកំណត់នៃការចម្រាញ់សារធាតុអ៊ុយរ៉ានីញ៉ូមរបស់កិច្ចព្រមព្រៀងនោះ និងកម្រិតការត្រួតពិនិត្យរបស់ IAEA ។

កាលពីខែកុម្ភៈទីភ្នាក់ងារ IAEA បានចេញផ្សាយរបាយការណ៍មួយដែលនិយាយថាស្ថានភាពបច្ចុប្បន្នគឺ "មានការព្រួយបារម្ភយ៉ាងខ្លាំង" ខណៈទីក្រុងតេអេរ៉ង់កំពុងបង្កើនការចម្រាញ់សារធាតុអ៊ុយរ៉ានីញ៉ូមសុទ្ធដល់ទៅ៦០% ដែលជិតឈានដល់កម្រិតផលិតគ្រាប់បែកនុយក្លេអ៊ែរ។ ទីក្រុងតេអេរ៉ង់បានបដិសេធជាយូរមកហើយក្នុងការស្វែងរកអាវុធនុយក្លេអ៊ែរ៕