យោងតាមមន្ត្រីនៃប្រទេសទាំងពីរបានឲ្យដឹងថា នៅទីបំផុត សហរដ្ឋអាមេរិក និងអ៊ុយក្រែន នឹងចុះហត្ថលេខាលើកិច្ចព្រមព្រៀងសិទ្ធិធនធានរ៉ែនៅសប្តាហ៍ក្រោយ បន្ទាប់ពីការចរចារយៈពេលជាច្រើនខែ។

ប្រធានាធិបតី លោក Trump បានប្រកាសនៅក្នុងការិយាល័យ Oval Office កាលពីថ្ងៃព្រហស្បតិ៍ថា កិច្ចព្រមព្រៀងមួយត្រូវបានឈានដល់ដោយបាននិយាយថា វានឹងត្រូវធ្វើឡើងជាផ្លូវការនៅថ្ងៃទី ២៤ ខែមេសា នៅទីតាំងមួយដែលត្រូវកំណត់នៅពេលក្រោយ។

នៅក្នុងការបង្ហោះលើបណ្តាញសង្គម X ជាបន្តបន្ទាប់ រដ្ឋមន្ត្រីក្រសួងសេដ្ឋកិច្ចអ៊ុយក្រែន លោកស្រី Yulia Svyrydenko បានប្រកាសថា «ជំហានថ្មីជាវិជ្ជមាន ត្រូវបានធ្វើឡើងនៅក្នុងវឌ្ឍនភាពដែលកំពុងបន្តជាមួយសហរដ្ឋអាមេរិក លើកិច្ចព្រមព្រៀងភាពជាដៃគូសេដ្ឋកិច្ច និងការបង្កើតមូលនិធិវិនិយោគសម្រាប់ការកសាងអ៊ុយក្រែនឡើងវិញ»។

លោកស្រី Svyrydenko បាននិយាយបន្ថែមថា «ក្រុមបច្ចេកទេសរបស់យើង បានធ្វើការយ៉ាងហ្មត់ចត់ជាមួយគ្នាលើកិច្ចព្រមព្រៀង ហើយមានវឌ្ឍនភាពគួរឱ្យកត់សម្គាល់។ បុគ្គលិកផ្នែកច្បាប់របស់យើង បានកែសម្រួលចំណុចមួយចំនួននៅក្នុងពង្រាងកិច្ចព្រមព្រៀង»។