នាយករងរបស់អង្គការនេះ បាននិយាយកាលពីថ្ងៃព្រហស្បតិ៍ថា កម្មវិធីស្បៀងអាហារពិភពលោក (WFP) បានបញ្ឈប់ការដឹកជញ្ជូនស្បៀងទៅកាន់តំបន់កាន់កាប់ដោយក្រុមហ៊ួទី នៅប្រទេសយេម៉ែន ហើយបានផ្អាកការចែកចាយស្បៀងនៅទីនោះ បន្ទាប់ពីក្រុមសកម្មប្រយុទ្ធ បានេរឹបអូសយកឃ្លាំងមួយរបស់ខ្លួន នៅភាគខាងជើង។

ការផ្អាកនេះ គឺធ្វើឲ្យប៉ះពាល់បន្ថែមទៀត នៅក្នុងប្រទេសដែលហែកហួរដោយសង្រ្គាម ដែលភាពស្រេកឃ្លាន បាននិងកំពុងកើនឡើង។ នៅក្នុងខែកុម្ភៈ អង្គការ WFP បាននិយាយថា ៦២% នៃគ្រួសារ ដែលខ្លួន បានស្ទង់មតិមិនអាចទទួលបានអាហារគ្រប់គ្រាន់ ដែលជាតួលេខមួយបានកើនឡើង ក្នុងរយៈពេល ៩ខែទៅនេះ។ អង្គការនេះ បានប៉ាន់ប្រមាណថា មនុស្សប្រហែល ១៧លាននាក់ គឺពាក់កណ្តាលនៃចំនួនប្រជាជនយេម៉ែន កំពុងប្រឈមនឹងអសន្តិសុខអាហារ។

លោក Carl Skau នាយករងប្រតិបត្តិ និងជានាយកប្រតិបត្តិរបស់ WFP បានប្រាប់សារព័ត៌មាន AP ថា ក្រុមឧទ្ទាមហ៊ួទី បានរឹបអូសឃ្លាំង នៅតំបន់ភាគខាងជើងនៃទីក្រុង Saada កាលពីពាក់កណ្តាលខែមីនា ហើយបានយកសម្ភារៈផ្តត់ផ្គង់មានតម្លៃប្រហែល ១.៦លានដុល្លារ។

ការរឹបអូសនេះ គឺជាការប៉ះទង្គិចចុងក្រោយបំផុតរវាងក្រុមហ៊ួទី និងអង្គការសហប្រជាជាតិ។ ក្រុមសកម្មប្រយុទ្ធក្នុងរយៈពេលប៉ុន្មានខែថ្មីៗនេះ បានចាប់ខ្លួនបុគ្គលិកអង្គការសហប្រជាជាតិរាប់សិបនាក់ ក៏ដូចជាមនុស្សដែលមានទំនាក់ទំនងជាមួយក្រុមផ្តល់ជំនួយ សង្គមស៊ីវិល និងស្ថានទូតអាមេរិក ដែលធ្លាប់បើក នៅទីក្រុង Sanaa ជារដ្ឋធានីនៃប្រទេសយេម៉ែន។