រដ្ឋមន្ត្រីក្រសួងព័ត៌មានលីបង់ លោក Paul Morcos បានប្រាប់អ្នកយកព័ត៌មាន បន្ទាប់ពីកិច្ចប្រជុំរដ្ឋាភិបាលមួយថា ចំនួននៃការរំលោភលើកិច្ចព្រមព្រៀងបទឈប់បាញ់ កាលពីថ្ងៃទី ២៧ ខែវិច្ឆិកា ឆ្នាំ ២០២៤ ជាមួយប្រទេសលីបង់ គឺ ២.៧០០ដង។

តួលេខនេះ បានឈរនៅត្រឹម ១.៥០០ដង កាលពីខែមុន។

យោងតាមលោក Morcos បានឲ្យដឹងថា សកម្មភាពឈ្លានពានរបស់អ៊ីស្រាអែល រារាំងកិច្ចខិតខំប្រឹងប្រែងរបស់កងទ័ពលីបង់ ក្នុងគោលបំណងធានាស្ថិរភាព នៅតាមព្រំដែនជាមួយអ៊ីស្រាអែល។

លោករដ្ឋមន្ត្រី បាននិយាយថា៖«អ៊ីស្រាអែលបានរំលោភលើបទឈប់បាញ់ចំនួន ២.៧០០ដង។ មនុស្សសរុបចំនួន ១៨០នាក់ បានធ្លាក់ខ្លួនជារងគ្រោះ ដោយការវាយឆ្មក់តាមអាកាស និងការវាយប្រហារដោយគ្រាប់ផ្លោង ចាប់តាំងពីខែវិច្ឆិកាឆ្នាំមុន« ដោយមិនបានបញ្ជាក់ថាតើមានជនស៊ីវិលប៉ុន្មាននាក់ទេ។

លោករដ្ឋមន្ត្រី បានសង្កត់ធ្ងន់ថា ការបន្តកាន់កាប់ស្រុកចំនួន ៥ របស់អ៊ីស្រាអែល នៅព្រំដែន គឺរំលោភលើសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ។

លោក Morcos បាននិយាយថា៖«កងទ័ពកំពុងប្រឈមនឹងការលំបាកជាច្រើន ដោយសារតែការវាយប្រហារឥតឈប់ឈរ និងការបដិសេធរបស់អ៊ីស្រាអែល ក្នុងការដកកងទ័ពរបស់ខ្លួន ចេញពីទឹកដីលីបង់។ ជាលទ្ធផល ការដាក់ពង្រាយកងទ័ពលីបង់ដែលរំពឹងទុកដោយកិច្ចព្រមព្រៀងនេះ ត្រូវបានពន្យារពេល»។