ទីភ្នាក់ងារព័ត៌មាន Bloomberg បានរាយការណ៍ដោយដកស្រង់សម្តីប្រភពថា សហភាពអឺរ៉ុប (EU) កំពុងធ្វើការលើសំណើមួយ ដើម្បីដាក់ចេញនូវការរឹតបន្តឹងលើការនាំចេញទំនិញមួយចំនួនរបស់អឺរ៉ុប ទៅកាន់សហរដ្ឋអាមេរិក។

យោងតាមទីភ្នាក់ងារសារព័ត៌មាន ចំណាត់ការនេះ កំពុងត្រូវបានចាត់ទុកថា ជាការការពារ ប្រសិនបើការចរចាពាណិជ្ជកម្មជាមួយទីក្រុងវ៉ាស៊ីនតោន បរាជ័យក្នុងការទទួលបានលទ្ធផលជាទីគាប់ចិត្ត។

ទីភ្នាក់ងារនេះ បានលើកឡើងថា ការរឹតបន្តឹងការនាំចេញទំនិញនេះ គឺជាជម្រើសមួយក្នុងចំណោមជម្រើសជាច្រើនដែលសហភាពអឺរ៉ុប កំពុងពិចារណាជាយុទ្ធសាស្ត្រសងសឹកដ៏មានសក្តានុពល។ លើសពីនេះ ទីក្រុងប្រ៊ុចសែល កំពុងពិចារណាដាក់បញ្ចូលបញ្ជីពន្ធបន្ថែមលើទំនិញអាមេរិក និងកំណត់ការផ្គត់ផ្គង់ សាធារណៈសម្រាប់ក្រុមហ៊ុនអាមេរិក។

នាពេលមុននេះ ប្រធានាធិបតីអាមេរិកលោក ដូណាល់ ត្រាំ (Donald Trump) បាននិយាយថា លោកមានទំនុកចិត្តយ៉ាងខ្លាំងចំពោះកិច្ចព្រមព្រៀងជាមួយសហភាពអឺរ៉ុប មុនពេលផុតកំណត់នៃរយៈពេលអនុគ្រោះរយៈពេល ៩០ថ្ងៃ លើពន្ធនាំចូលបន្ថែម ដែលលោកបានកំណត់សម្រាប់ប្រទេសមួយចំនួននោះ។