ដោយមិនអាចបំពេញតាមការសន្យារបស់លោកបាន អំឡុងពេលធ្វើយុទ្ធនាការ ដែលថា លោកនឹងនាំឲ្យមានសន្តិភាពយ៉ាងឆាប់រហ័ស សម្រាប់តំបន់ហ្កាហ្សា និងប្រទេសអ៊ុយក្រែន ប្រធានាធិបតីសហរដ្ឋអាមេរិក លោក Donald Trump បានងាកទៅរកបញ្ហាប្រឈមដ៏ធំមួយទៀត ដែលអាចជាការពិបាកសម្រេចបានដែរនោះ គឺការទប់ស្កាត់កម្មវិធីនុយក្លេអ៊ែររបស់អ៊ីរ៉ង់ដែលកំពុងតែរីកធំឡើងៗជាលំដាប់។

រដ្ឋបាលរបស់លោក Trump គ្រោងធ្វើកិច្ចចរចាជុំទី២ ជាមួយអ៊ីរ៉ង់ នាថ្ងៃសៅរ៍ចុងសប្ដាហ៍នេះ នៅទីក្រុងរ៉ូម ប្រទេសអ៊ីតាលី ដែលមនុស្សមួយចំនួនគិតថា អាចកើតឡើងបានបន្ទាប់ពីមានអរិភាពជាច្រើនឆ្នាំ តាំងពីអាណត្តិដំបូងរបស់ប្រធានាធិបតីទៅពីបក្សសាធារណរដ្ឋ ជាពេលដែលលោកបានលុបចោលកិច្ចព្រមព្រៀងនុយក្លេអ៊ែរឆ្នាំ២០១៥ ហើយបានចេញនូវយុទ្ធនាការ «សម្ពាធអតិបរមា« នៃការដាក់ទណ្ឌកម្មយ៉ាងធ្ងន់ធ្ងរ។ 

បើទោះបីជាគ្មាននរណាម្នាក់ ច្រានចោលសក្តានុពលពីការមានវឌ្ឍនភាព ក្រោយកិច្ចប្រជុំ នៅប្រទេសអូម៉ង់ កាលពីចុងសប្តាហ៍មុន ដែលភាគីទាំង២ បានពិពណ៌នាថា មានភាពវិជ្ជមានក៏ដោយ ក៏អ្នកចរចាកំពុងបន្ទាបការរំពឹងទុកណាមួយពីការបំបែកភាពទាល់ច្រកយ៉ាងឆាប់រហ័ស នៅក្នុងជម្លោះដែលអូសបន្លាយរាប់ទសវត្សរ៍នេះ។ 

ក្រោយមានកិច្ចប្រជុំ នៅសេតវិមាន ជាមួយលោកប្រធានាធិបតី កាលពីថ្ងៃអង្គារ ប្រភពមួយបានប្រាប់ឲ្យដឹងថា ការជជែកពិភាក្សាលើមូលដ្ឋានគ្រឹះនៃកិច្ចព្រមព្រៀងនុយក្លេអ៊ែរដែលអាចកើតមាន គឺស្ថិតនៅដំណាក់កាលដំបូងណាស់ ក្នុងចំណោមជំនួយការរបស់លោក Trump។ ប្រភព ២រូបដែលបានដឹងពីទស្សនៈរបស់សេតវិមាន បានប្រាប់ថា ភាគីទាំង២ អាចឈានដល់កិច្ចព្រមព្រៀងបណ្តោះអាសន្ន មុនមានកិច្ចព្រមព្រៀងលម្អិតបន្ថែមទៀត។

ការបន្ថែមភាពតានតឹង ក្នុងតំបន់ នៅជុំវិញកិច្ចប្រឹងប្រែងការទូត គឺជាការគំរាមកំហែងម្តងហើយម្តងទៀតរបស់លោក Trump ដែលថា នឹងទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់ ប្រសិនបើកិច្ចព្រមព្រៀងមិនអាចសម្រេចបាន។ នោះមានន័យថា លោក Trump ដែលបានសន្យានៅក្នុងសុន្ទរកថាចូលកាន់តំណែង កាលពីថ្ងៃទី២០ ខែមករាថា លោកនឹងក្លាយជា «អ្នកបង្កើតសន្តិភាព« អាចជំរុញឲ្យអាមេរិកចូលទៅក្នុងជម្លោះថ្មី នៅមជ្ឈិមបូព៌ា។ តែលោក Trump បាននិយាយកាលពីថ្ងៃព្រហស្បតិ៍ថា លោកមិនប្រញាប់ប្រញាល់វាយប្រហារអ៊ីរ៉ង់ទេ ដោយទទូចថា ការចរចាគឺជាជម្រើសដំបូង។ 

អ្នកដឹកនាំក្រុមចរចារបស់សហរដ្ឋអាមេរិក គឺលោក Steve Witkoff ដែលជាមិត្តរបស់លោក Trump និងជាអ្នកវិនិយោគអចលនទ្រព្យគ្មានបទពិសោធន៍ការទូតពីមុន ដែលអ្នកវិភាគមួយចំនួន បានដាក់រហ័សនាមថា «បេសកជនសម្រាប់កិច្ចការគ្រប់យ៉ាង» របស់រដ្ឋបាលនេះ។ រូបលោកត្រូវបានប្រគល់ភារកិច្ចឲ្យដំណើរការការចរចាកិច្ចព្រមព្រៀងជាមួយអ៊ីរ៉ង់ បន្ថែមពីលើការបញ្ចប់សង្គ្រាម នៅតំបន់ហ្កាហ្សា និងអ៊ុយក្រែន ដែលប្រទេសទាំង២ នៅតែបន្តមានជម្លោះដដែល៕