ប្រមុខមូលនិធិរូបិយវត្ថុអន្តរជាតិ (IMF) កាលពីថ្ងៃព្រហស្បតិ៍ (ទី១៧ ខែមេសា) បានព្រមានថា សេដ្ឋកិច្ចពិភពលោកនឹងមានកំណើនយឺត ដោយសារតែការប្រែប្រួលពាណិជ្ជកម្មពិភពលោកដែលបង្កឡើងដោយសហរដ្ឋអាមេរិក ប៉ុន្តែឱនភាពមិនស្ថិតនៅក្នុងការព្យាករនោះទេ។

អំឡុងពេលថ្លែងនៅមុនកិច្ចប្រជុំនិទាឃរដូវរបស់ IMF នាសប្តាហ៍ក្រោយ នៅទីក្រុងវ៉ាស៊ីនតោន នាយកគ្រប់គ្រងស្ថាប័ននេះ លោកស្រី Kristalina Georgieva បាននិយាយថា ការកើនឡើងនូវវិធានការគាំពារនិយមដែលបង្កឡើងដោយការទូតគំរាមកំហែងដំឡើងពន្ធរបស់ប្រធានាធិបតីអាមេរិក លោក Donald Trump នឹងបង្កើតឲ្យមានភាពមិនប្រាកដប្រជា ពន្យឺតកំណើន និងធ្វើឲ្យផលិតភាពជាប់គាំង។

លោកស្រីបានបន្ថែមថា៖ «ការធ្វើពាណិជ្ជកម្មនៅតែបន្តមាន ប៉ុន្តែការរំខាននាំឲ្យមានការចំណាយបន្ថែម។ ការព្យាករកំណើនសេដ្ឋកិច្ចថ្មីរបស់យើង នឹងរួមបញ្ចូលការធ្លាក់ចុះគួរឲ្យកត់សម្គាល់ ប៉ុន្តែមិនមែនជាឱនភាពសេដ្ឋកិច្ចនោះទេ ខណៈដែលប្រទេសមួយចំនួនក៏នឹងមានអតិផរណាលឿនជាងមុនផងដែរ»។

IMF គ្រោងនឹងចេញផ្សាយការព្យាករថ្មីនៅក្នុងទស្សនវិស័យសេដ្ឋកិច្ចពិភពលោករបស់ខ្លួន នៅថ្ងៃទី២២ ខែមេសា។ រដ្ឋមន្ត្រីហិរញ្ញវត្ថុ និងធនាគារកណ្តាល កំពុងជួបជុំគ្នានៅទីក្រុងវ៉ាស៊ីនតោន ជាកន្លែងដែលកិច្ចប្រជុំត្រូវបានរៀបចំរួមដោយធនាគារពិភពលោក ដើម្បីវាយតម្លៃបរិយាកាសពិភពលោកដែលមានភាពរង្គោះរង្គើដោយសារកិច្ចប្រឹងប្រែងរបស់លោក Trump ក្នុងការរៀបចំពាណិជ្ជកម្មពិភពលោកឡើងវិញ និងរារាំងគូប្រជែងដ៏ធំរបស់ខ្លួន គឺប្រទេសចិន៕