គ្មានកិច្ចព្រមព្រៀងត្រូវបានចុះហត្ថលេខានោះឡើយ ហើយការយល់ឃើញខុសគ្នាជាច្រើន នៅតែមានរវាងប្រទេសទាំង២។ ប៉ុន្តែសម្រាប់ចេតនា និងគោលបំណងទាំងអស់ ការចរចាពាណិជ្ជកម្មជុំទី១ រវាងសហរដ្ឋអាមេរិក និងជប៉ុន កាលពីថ្ងៃទី១៦ ខែមេសា ត្រូវបានមើលឃើញនៅក្នុងទីក្រុងតូក្យូថា ជាជោគជ័យមួយកម្រិត បើធៀបនឹងស្ថានភាពកន្លងមក។

ប្រធានាធិបតីអាមេរិក លោក Donald Trump មិនបានផ្លាស់ប្តូរជំហរសូម្បីតែមួយមីលីម៉ែត្រ ជុំវិញវិធានការពន្ធរបស់លោក ។ ប៉ុន្តែលោកបានលើកឡើងពី«វឌ្ឍនភាពដ៏ធំ» ក្នុងការពិភាក្សាជាមួយរដ្ឋមន្ត្រីទទួលបន្ទុកស្តារសេដ្ឋកិច្ចរបស់ជប៉ុន គឺលោក Ryosei Akazawa ដែលលោកនាយករដ្ឋមន្ត្រី លោក Shigeru Ishiba តែងតាំងជាអ្នកគ្រប់គ្រងផ្នែកពន្ធដារ។ រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent រដ្ឋមន្ត្រីពាណិជ្ជកម្ម លោក Howard Lutnick និងតំណាងពាណិជ្ជកម្ម លោក Jamieson Greer ក៏ចូលរួមក្នុងកិច្ចពិភាក្សានេះផងដែរ។

តាមរយៈការបង្ហោះ នៅលើបណ្ដាញសង្គម Truth Social របស់លោក ដោយភ្ជាប់ជាមួយរូបថតរបស់លោកជាមួយលោក Akazawa លោក Trump បានសរសេរថា៖ «ជាកិត្តិយសដ៏អស្ចារ្យដែលទើបតែបានជួបជាមួយគណៈប្រតិភូជប៉ុន ស្តីពីបញ្ហាពាណិជ្ជកម្ម។ ជាវឌ្ឍនភាពធំ!»។

គួររំលឹកថា កាលពីថ្ងៃទី២ ខែមេសា លោក Trump បានប្រកាសអត្រាពន្ធ «បដិការ» ចាប់ពី ១០ភាគរយទៅ ៥០ភាគរយលើដៃគូពាណិជ្ជកម្មជាច្រើនរបស់សហរដ្ឋអាមេរិក ដោយប្រទេសជប៉ុនត្រូវបានដាក់ ២៤ភាគរយ។ កាតព្វកិច្ចពន្ធទាំងនេះ ឥឡូវនេះត្រូវបានផ្អាករយៈពេល ៩០ថ្ងៃ រហូតដល់ថ្ងៃទី៨ ខែកក្កដា ហើយប្រទេសជាច្រើនកំពុងព្យាយាមចរចាជាមួយសហរដ្ឋអាមេរិក៕