នៅថ្ងៃសុក្រនេះ ប្រទេសឥណ្ឌូនេស៊ី និយាយថា ពួកគេនឹងបង្កើនការនាំចូលប្រេង និងឧស្ម័នពីសហរដ្ឋអាមេរិក ដែលជាផ្នែកមួយនៃកិច្ចព្រមព្រៀង ដើម្បីបន្ធូរបន្ថយការដំឡើងពន្ធគំរាមដោយទីក្រុងវ៉ាស៊ីនតោន ហើយកិច្ចប្រជុំនឹងត្រូវបញ្ចប់ក្នុងរយៈពេល ២ខែ ។

រដ្ឋមន្រ្តីសដ្ឋកិច្ចឥណ្ឌូនេស៊ីលោក Airlangga Hartarto បានធ្វើសេចក្តីអត្ថាធិប្បាយបែបនេះ ក្រោយរូបលោក និងប្រតិភូផ្សេងទៀត បានជួបជាមួយរដ្ឋមន្រ្តីពាណិជ្ជកម្មសហរដ្ឋអាមេរិកលោក Howard Lutnick អ្នកតំណាងក្រសួងពាណិជ្ជកម្មសហរដ្ឋអាមេរិកលោក Jamieson Greer និងរដ្ឋមន្រ្តីការបរទេសសហរដ្ឋអាមេរិកលោក Marco Rubio ។

លោក Airlangga បាននិយាយប្រាប់សន្និសីទសារព័ត៌មានតាមអនឡាញនៅទីក្រុងវ៉ាស៊ីនតោនថា ឥណ្ឌូនេស៊ី នឹងបង្កើនការទិញថាមពលពីសហរដ្ឋអាមេរិក រួមទាំងឧស្ម័នធម្មជាតិរាវ(LPG) ប្រេងឆៅ និងប្រេងសាំង ។

លោកបន្តថា ឥណ្ឌូនេស៊ី មានគម្រោងផងដែរក្នុងបន្តទិញផលិតផលកសិកម្មពីសហរដ្ឋអាមេរិក ដូចជាស្រូវសាលី សណ្តែកសៀង និងទឹកសណ្តែក ។

លោកថា ក្រុមប្រតិភូរបស់លោកសង្ឃឹមថានឹងជួបជាមួយរដ្ឋមន្រ្តីក្រសួងរតនាគារសហរដ្ឋអាមេរិកលោក Scott Bessent នៅសប្តាហ៍ក្រោយ ហើយឥណ្ឌូនេស៊ី គឺជាប្រទេសមួយក្នុងចំណោមប្រទេសដំបូងដែលរដ្ឋាភិបាលសហរដ្ឋអាមេរិកព្រមទទួលយកការចរចា ។

លោក Airlangga បានបញ្ជាក់ផងដែរថា ឥណ្ឌូនេស៊ីសន្យាថា ពួកគេនឹងជួយក្រុមហ៊ុនសហរដ្ឋអាមេរិកប្រតិបត្តិការនៅឥណ្ឌូនេស៊ី ដោយមានការអនុញ្ញាត និងការលើកទឹកចិត្តងាយស្រួលជាងមុន ។

ការដំឡើងពន្ធ ៣២ភាគរយដាក់លើឥណ្ឌូនេស៊ី ត្រូវបានប្រកាសកាលពីថ្ងៃទី ២ ខែមេសា ដែលជាថ្ងៃ“ទិវារំដោះ”របស់លោក Donald Trump ស្ថិតក្នុងចំណោមការដំឡើងពន្ធខ្ពស់បំផុតរបស់អាស៊ី ប៉ុន្តែដូចគ្នានឹងប្រទេសដទៃទៀតដែរ ពួកគេទទួលបានការផ្អាករយៈពេល ៩០ថ្ងៃ ដើម្បីអនុញ្ញាតឲ្យមានពេលចរចា ៕