មជ្ឈមណ្ឌលព្យាបាលជាតិពុល Ramathibodi បានចេញការព្រមាន អំពីឱសថខុសច្បាប់ដ៏គ្រោះថ្នាក់មួយ ដែលត្រូវបានស្គាល់ឈ្មោះតាមផ្លូវ «Labubu» (ឡាប៊ូប៊ូ) ឬ «Khanom» (អាហារសម្រន់) ដោយតាមសេចក្ដីរាយការណ៍ បានឲ្យដឹងថា ត្រូវបានចែកចាយនៅក្នុងចំណោមអ្នកដើរកម្សាន្ត អំឡុងបុណ្យចូលឆ្នាំថ្មីរបស់ប្រទេសនេះ។

ថ្នាំគ្រាប់នេះត្រូវបានរាយការណ៍ថា យកគំរូតាមរូបរាងរបស់តុក្កតាដ៏ពេញនិយម Labubu ដែលបង្កើតឡើងដោយអ្នករចនា នៅទីក្រុងហុងកុង ឈ្មោះ Kasing Lung។

តាមរយៈការបង្ហោះនៅលើបណ្ដាញសង្គម Facebook នៅថ្ងៃសុក្រ (ទី១៨ ខែមេសា) នេះ មជ្ឈមណ្ឌលនេះ បានឲ្យដឹងថា មនុស្ស ៣នាក់ដែលបានចូលរួមពិធីបុណ្យ នៅទីក្រុងបាងកក និងដែលបានប្រើប្រាស់ថ្នាំនេះ មានប្រតិកម្មធ្ងន់ធ្ងរ ដែលរួមមានសន្លប់ កន្ត្រាក់សាច់ដុំ ខ្សោយផ្លូវដង្ហើម និងគាំងបេះដូង។

ក្នុងចំណោមករណីទាំងនេះ មាន ២នាក់ បានបាត់បង់ជីវិត ហើយម្នាក់ទៀត ស្ថិតនៅក្នុងបន្ទប់សង្គ្រោះបន្ទាន់។ ការរកឃើញបឋម បង្ហាញថា ថ្នាំនេះអាចជាការរួមបញ្ចូលគ្នានៃសារធាតុរំញោច និងថ្នាំរម្ងាប់អារម្មណ៍ ដែលអាចបង្កើនឥទ្ធិពលប្រកបដោយគ្រោះថ្នាក់។

មជ្ឈមណ្ឌលបានឲ្យដឹងទៀតថា ប៉ុន្តែការវិភាគមន្ទីរពិសោធន៍ នៅតែកំពុងដំណើរការ ដើម្បីបញ្ជាក់ពីសារធាតុពិតប្រាកដដែលពាក់ព័ន្ធ។ ហើយស្ថាប័នេះបានកត់សម្គាល់ថា ឧប្បត្តិហេតុស្រដៀងគ្នានេះ បានកើតឡើងនៅក្នុងឆ្នាំ២០២២ ដោយមានការរីករាលដាលនៃស្រា «K Nom Phong» ជាស្រាក្រឡុកគ្រឿងញៀនដ៏សាហាវដែលបណ្តាលឲ្យមនុស្សស្លាប់ជាច្រើននាក់ នៅទូទាំងប្រទេសថៃ៕