នាយករដ្ឋមន្ត្រីវៀតណាម លោក Pham Minh Chinh បាននិយាយថា ប្រទេសរបស់លោកមាន «ចំណងទាក់ទងពិសេស» ជាមួយសហរដ្ឋអាមេរិក ខណៈដែលរដ្ឋាភិបាលរបស់លោកចូលរួមក្នុងកិច្ចពិភាក្សាពាណិជ្ជកម្មជាមួយរដ្ឋបាលរបស់លោកប្រធានាធិបតី Donald Trump ដើម្បីបញ្ចៀសការយកពន្ធខ្ពស់លើផលិតផលរបស់ខ្លួន។

បើយោងតាមការបង្ហោះ នៅលើគេហទំព័ររបស់រដ្ឋាភិបាល នាថ្ងៃសុក្រ (ទី១៨ ខែមេសា) នេះ បានបង្ហាញថា លោក Chinh ដែលកាលពីដើមសប្តាហ៍នេះ បានស្វាគមន៍យ៉ាងកក់ក្តៅ ចំពោះប្រធានាធិបតីចិន លោក ស៊ី ជីនពីង (Xi Jinping) នៅទីក្រុងហាណូយ បានលើកឡើងថា ទំនាក់ទំនងរបស់វៀតណាមជាមួយសហរដ្ឋអាមេរិក គឺមិនដូចការប្រាស្រ័យទាក់ទងជាមួយប្រទេសដទៃនោះទេ។

លោកនាយករដ្ឋមន្ត្រីបានធ្វើអត្ថាធិប្បាយបែបនេះ អំឡុងពេលមានកិច្ចប្រជុំ នៅរដ្ឋធានី ជាមួយនាយកប្រតិបត្តិរបស់ក្រុមហ៊ុន Warburg Pincus គឺលោក Jeffrey Perlman ដែលក៏មានតួនាទីផងដែរជាប្រធានក្រុមប្រឹក្សាធុរកិច្ចអាមេរិក-អាស៊ាន។ ឯកអគ្គរដ្ឋទូតសហរដ្ឋអាមេរិកប្រចាំនៅវៀតណាម លោក Marc Knapper ក៏បានចូលរួមក្នុងជំនួបនេះផងដែរ។

វៀតណាម គឺជាប្រទេសមួយក្នុងចំណោមប្រទេសដំបូងគេដែលត្រូវបានជ្រើសរើសដោយប្រធានាធិបតីអាមេរិក Donald Trump សម្រាប់ការបង្ហាញឆន្ទៈ ក្នុងការចរចាលើបញ្ហាពន្ធគយ បន្ទាប់ពីការសន្ទនាតាមទូរស័ព្ទ រវាងមេដឹកនាំអាមេរិក និងប្រធានបក្សកុម្មុយនីស្ត លោក To Lam។

ប្រទេសទាំង២ បានប្រកាសពីកិច្ចចរចាជាច្រើនម៉ោង បន្ទាប់ពីលោក Trump បានសម្រេចផ្អាករយៈពេល ៩០ថ្ងៃមិនអនុវត្តវិធានការយកពន្ធដ៏ខ្ពស់របស់ខ្លួន ដោយលោកបានយកក្នុងកម្រិតបណ្តោះអាសន្ន ១០ភាគរយ។ វៀតណាមកំពុងប្រឈមនឹងអត្រាពន្ធ ៤៦ភាគរយលើផលិតផលដែលនាំចេញទៅកាន់ទីផ្សារនាំចេញដ៏ធំបំផុតរបស់ខ្លួន៕