មន្ត្រីជាន់ខ្ពស់មួយរូប នៅថ្ងៃសុក្រ (ទី១៨ ខែមេសា) បាននិយាយថា ប្រទេសប៉ាគីស្ថានបានបណ្តេញជនជាតិអាហ្វហ្គានីស្ថានជាង ៨០.០០០នាក់ គិតចាប់តាំងពីចុងខែមីនាមក ដែលជាផ្នែកមួយនៃការជំរុញការធ្វើមាតុភូមិនិវត្តន៍ នៅមុនថ្ងៃផុតកំណត់ថ្ងៃទី៣០ ខែមេសា។

ជនជាតិអាហ្វហ្គានីស្ថានដែលរស់នៅខុសច្បាប់ ឬអ្នកដែលកាន់ប័ណ្ណសញ្ជាតិអាហ្វហ្គានីស្ថាន ត្រូវបានព្រមានដោយទីក្រុង Islamabad ឲ្យវិលត្រលប់ទៅប្រទេសកំណើតវិញ ឬបើមិនដូច្នោះទេ ត្រូវប្រឈមនឹងការនិរទេស នៅថ្ងៃទី៣១ ខែមីនា ជាថ្ងៃផុតកំណត់ ដែលបន្ទាប់មកត្រូវបានពន្យារដល់ថ្ងៃទី៣០ ខែមេសា។

ទីប្រឹក្សាក្រសួងមហាផ្ទៃ លោក Talal Chaudhry បានប្រាប់សន្និសីទសារព័ត៌មាននៅទីក្រុង Islamabad ថា ថ្ងៃផុតកំណត់ទី៣០ ខែមេសា គឺជាថ្ងៃចុងក្រោយ ដោយលោកបានគូសបញ្ជាក់ថា មានតែជនជាតិអាហ្វហ្គានីស្ថានដែលកាន់ទិដ្ឋាការស្របច្បាប់ប៉ុណ្ណោះ ទើបអាចទទួលបានការអនុញ្ញាតឲ្យស្នាក់នៅបន្ត ក្នុងប្រទេសប៉ាគីស្ថាន។

គួរបញ្ជាក់ថា កិច្ចប្រឹងប្រែងជំរុញឲ្យធ្វើមាតុភូមិនិវត្តន៍ គឺជាផ្នែកមួយនៃយុទ្ធនាការ ដែលមានឈ្មោះថា ផែនការធ្វើមាតុភូមិនិវត្តន៍ជនបរទេសខុសច្បាប់ (Illegal Foreigners Repatriation Plan) ដែលបានចាប់ផ្តើមឡើងនៅចុងឆ្នាំ២០២៣។

កន្លងមកប៉ាគីស្ថាន បានលើកឡើងថា ការវាយប្រហារ និងឧក្រិដ្ឋកម្មផ្សេងៗទៅលើពលរដ្ឋអាហ្វហ្គានីស្ថាន គឺជាស្នាដៃរបស់ជនជាតិអាហ្វហ្គានីស្ថាន ដែលបង្កើតជាក្រុមជនអន្តោប្រវេសន៍ច្រើនជាងគេនៅក្នុងប្រទេស។ អាហ្វហ្គានីស្ថានបានច្រានចោលការចោទប្រកាន់នេះ ហើយបានចាត់ទុកការធ្វើមាតុភូមិនិវត្តន៍នេះថា ជាការនិរទេសដោយបង្ខំ៕