ប្រធានាធិបតីសហរដ្ឋអាមេរិកលោក Donald Trump និងរដ្ឋមន្ត្រីការបរទេស លោក Marco Rubio បាននិយាយកាលពីថ្ងៃសុក្រ ថា សហរដ្ឋអាមេរិកនឹងដើរចេញពីកិច្ចខិតខំប្រឹងប្រែងដើម្បីសម្របសម្រួលកិច្ចព្រមព្រៀងសន្តិភាពរុស្ស៊ី-អ៊ុយក្រែន ប្រសិនបើគ្មានសញ្ញាច្បាស់លាស់នៃវឌ្ឍនភាពក្នុងពេលឆាប់ៗនេះ។

លោក Trump បាននិយាយទៅកាន់អ្នកយកព័ត៌មាននៅសេតវិមានថា « យើងចង់ឲ្យវាចប់សព្វគ្រប់ឲ្យបានយ៉ាងឆាប់បំផុត»។ បច្ចុប្បន្ននេះ ប្រសិនបើមានហេតុផលមួយចំនួន ដែលភាគីណាមួយក្នុងចំណោមភាគីទាំងពីរបង្កការលំបាកខ្លាំង យើងគ្រាន់តែនិយាយថា «អ្នកល្ងង់ អ្នកពិតជាល្ងង់ណាស់ អ្នកជាមនុស្សបង្កបញ្ហា»។ 

ការអត្ថាធិប្បាយរបស់លោក Trump បានធ្វើឡើងបន្ទាប់ពីការលើកឡើងរបស់លោក Rubio អ្នកការទូតជាន់ខ្ពស់របស់លោក ដែលបាននិយាយថា ភាគីទាំងអស់មានពេលតែប៉ុន្មានថ្ងៃប៉ុណ្ណោះដើម្បីបង្ហាញពីវឌ្ឍនភាព បើមិនដូច្នេះទេទីក្រុងវ៉ាស៊ីនតោននឹងដើរចេញ។

លោក Rubio បាននិយាយនៅក្នុងទីក្រុងប៉ារីស បន្ទាប់ពីជួបមេដឹកនាំអឺរ៉ុប និងអ៊ុយក្រែន ថា «យើងនឹងមិនបន្តកិច្ចខិតខំប្រឹងប្រែងនេះសម្រាប់ច្រើនសប្តាហ៍ និងច្រើនខែ ដើម្បីដល់ទីបញ្ចប់នោះទេ។ ដូច្នេះយើងត្រូវកំណត់ឱ្យបានឆាប់បំផុតនៅពេលនេះ។

នៅពេលត្រូវបានសួរ លោក Trump បានបដិសេធមិនកំណត់ពេលវេលាជាក់លាក់ណាមួយសម្រាប់រយៈពេលយូរប៉ុណ្ណាដែលលោកនឹងរង់ចាំ។