ការវាយប្រហារតាមអាកាសរបស់អ៊ីស្រាអែល នៅទូទាំងតំបន់ហ្កាហ្សាស្ទ្រីប កាលពីថ្ងៃសុក្រ បានសម្លាប់ជនជាតិប៉ាឡេស្ទីនយ៉ាងតិច ៤៥នាក់ និងរាប់សិបនាក់ផ្សេងទៀត រងរបួស។ នេះបើយោងតាមអង្គភាព ការពារជនស៊ីវិល នៅក្នុងតំបន់ហ្កាហ្សា។

លោក Mahmoud Basal អ្នកនាំពាក្យអង្គភាពការពារជនស៊ីវិល បាននិយាយថា នៅទីក្រុង Khan Younis ភាគខាងត្បូង មនុស្ស ១០នាក់ ត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែល ដោយបានកំណត់គោលដៅទៅលើផ្ទះលំនៅឋាន ដែលជាកម្មសិទ្ធិរបស់គ្រួសាររបស់លោក Baraka ខណៈមនុស្ស ៦នាក់ ផ្សេងទៀត រួមទាំងកុមារ ២នាក់ និងស្ត្រីម្នាក់ បានស្លាប់ បន្ទាប់ពីការវាយប្រហារតាមអាកាសទៅលើហាងកាត់សក់មួយកន្លែង។

លោកបានបន្ថែមថា៖«ការវាយប្រហារជាច្រើនផ្សេងទៀត នៅក្នុងទីក្រុង Khan Younis ត្រូវបានគេរាយការណ៍ថា បានសម្លាប់មនុស្ស ៨នាក់ទៀត ខណៈដែលពីរនាក់ផ្សេងទៀត ត្រូវបានសម្លាប់ នៅក្នុងទីក្រុង Rafah ភាគខាងត្បូង»។

លោក Basal បាននិយាយថា នៅភាគខាងជើង មនុស្សយ៉ាងតិច ១៣នាក់ បានស្លាប់ និងជាច្រើននាក់ទៀត បានរងរបួស នៅពេលដែលការវាយប្រហារមួយ បានត្រូវចំផ្ទះមួយខ្នង នៅក្នុងតំបន់ Tal al-Zaatar ដោយបានបញ្ជាក់ថា មនុស្ស ៦នាក់ ត្រូវបានសម្លាប់ នៅក្នុងការវាយប្រហារតាមអាកាសទៅលើតង់ចំនួនពីរ នៅក្នុងទីក្រុងហ្កាហ្សា។