ភ្នំពេញ៖ ឯកឧត្តម វ៉ាង វិនប៊ិន ឯកអគ្គរដ្ឋទូតចិនប្រចាំនៅកម្ពុជា បានថ្លែងថា ឯកឧត្តម ស៊ី ជីងពីង ប្រធានាធិបតីចិន បានចិត្តទុកដាក់យ៉ាងខ្លាំងលើទំនាក់ទំនងកម្ពុជា-ចិន ហើយ​បាន​សន្យា​ពូន​ជ្រំ​ឈាន​ដល់កម្រិតមួយទៀត ជាមួយនឹងការជួយការពារ​ និងលើកមុខមាត់កម្ពុជា ទាំង​នៅ​លើ​ក្នុង​តំបន់ និងនៅលើពិភពលោក។

ក្នុងសន្និសីទសារព័ត៌មានស្តីពី លទ្ធផលនៃដំណើរទស្សនកិច្ចរបស់ឯកឧត្តម ស៊ី ជីនពីង​ក្នុង​ប្រទេស​កម្ពុជា នាថ្ងៃទី១៩ ខែមេសា ឆ្នាំ២០២៥នេះ ឯកឧត្តមឯកអគ្គរដ្ឋទូត មានប្រសាសន៍ថា ដំណើរ​ទសន្សកិច្ចនេះ គឺពិតជាទទួលបាននូវផ្លែផ្កាជាទីបំផុត ក្នុងនាមជាមិត្តដែកថែប និង​មាន​ទំនាក់​ទំនង​ជាមួយគ្នាជាច្រើនទសវត្សមកហើយនេះ ហើយទំនាក់ទំនងនេះ គឺមិនអាច​អ្នកណាមកបំបែកបាននោះទេ ។

ឯកឧត្តម បានបន្តថា ចិនបន្តចូលរួមជួយអភិវឌ្ឍប្រទេសកម្ពុជា នឹងធ្វើឲ្យសម្រេច​បាន​នូវ​ចក្ខុ​វិស័យ​កម្ពុជា ឆ្នាំ២០៣០ និងឆ្នាំ២០៥០ ហើយបន្តគាំទ្រគ្នាទៅវិញទៅមក លើគោល​នយោបាយ​ការពារ​សន្តិសុខក្នុងតំបន់ និងពិភពលោក ជាមួយនឹងការលើកមុខលើកមាត់កម្ពុជា ទាំងនៅ​ឆាក​តំបន់ និងឆាកអន្តរជាតិ ។

គួរបញ្ជាក់ថា ប្រធានាធិបតីចិន ឯកឧត្តម ស៊ី ជីងពីង បានធ្វើ​ទស្សន​កិច្ច​ផ្លូវ​រដ្ឋ​នៅ​កម្ពុជា​រយៈ​ពេល​ថ្ងៃ គឺនៅថ្ងៃទី១៧-១៨ ខែមេសា នេះ បានបញ្ចប់ទៅដោយលទ្ធផលផ្លែផ្លា ជាមួយ​នឹង​ការ​សម្រេច​បង្កើន​កិច្ច​សហប្រតិបត្តិការ លើវិស័យជាច្រើន ដើម្បីជាប្រយោជ​ន៍​ទៅ​វិញ​ទៅ​មក​នៃ​ប្រទេស​ជា​មិត្ត​ដែក​ថែប​ទាំង​ពីរ​នេះ ។

ដំណើរទស្សនកិច្ចដ៏មានសារសំខាន់នេះ មិនត្រឹមតែបានបញ្ជាក់សាជាថ្មីពីការប្តេជ្ញាចិត្តឥតងាករេ ចំពោះទំនាក់ទំនងមិត្តភាពដែកថែបរវាងកម្ពុជា និងចិនប៉ុណ្ណោះទេ ប៉ុន្តែថែមទាំងបានពង្រឹង និង​ធ្វើ​ឱ្យស៊ីជម្រៅថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការ ឈ្នះ-ឈ្នះ រវាងប្រទេសទាំងពីរ ។

ដំណើរ​ទស្សនកិច្ចនេះ បានបន្ថែមសន្ទុះថ្មី ដល់ការកសាងសហគមន៍វាសនារួមកម្ពុជា-ចិន គ្រប់​រដូវ​កាល ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ ។ ក្នុង​បរិការណ៍នេះ ភាគីទាំងពីរ បានសម្តែងការប្តេជ្ញាចិត្តក្នុងការធានាការអនុវត្តប្រកប ដោយ​ប្រសិទ្ធ​ភាព នៃក្របខណ្ឌកិច្ចសហប្រតិបត្តិការត្បូងពេជ្រ និងពន្លឿនការកសាង “ច្រករបៀង ឧស្សាហកម្ម និងបច្ចេកវិទ្យា” និង “ច្រករបៀងមច្ឆា និងអង្ករ” ៕ អត្ថបទ បាន សុខរិទ្ធិ