ភ្នំពេញ៖ ឯកឧត្ដម សុខ សុក្រឹត្យា ទីប្រឹក្សាផ្ទាល់សម្ដេចតេជោ ហ៊ុន សែន នាយករដ្ឋមន្ត្រី និងជារដ្ឋលេខាធិការក្រសួងទេសចរណ៍ បានស្នើដល់រាជរដ្ឋាភិបាលថៃ ចូលរួមសហការជាមួយកម្ពុជា ក្នុងការប្រយុទ្ធប្រឆាំងព័ត៌មានក្លែងក្លាយ។
ក្នុងជំនួបជាមួយ ឯកឧត្តមប្រាវីដ វង្សសុវណ្ណ ឧបនាយករដ្ឋមន្ត្រីទទួលបន្ទុកសន្តិសុខជាតិនៃព្រះរាជាណាចក្រថៃ និងជាប្រធានគណបក្សផ្លាំងប្រាឆារ៉ាត កាលពីពេលថ្មីៗនេះ ឯកឧត្តមបណ្ឌិត សុខ សុក្រឹត្យា មានប្រសាសន៍ថា កម្ពុជាមានគោលបំណងបន្តជំរុញកិច្ចសហប្រតិបត្តិការល្អ ក្នុងកិច្ចការផ្លាស់ប្តូរពាណិជ្ជកម្មតាមព្រំដែនជាមួយថៃ ឲ្យកាន់តែល្អប្រសើរឡើង បើទោះបីប្រទេសទាំងពីរ នៅបន្តរកឃើញអ្នកវិជ្ជមានកូវីដ១៩ រាល់ថ្ងៃក៏ដោយ។
ឯកឧត្ដមបន្តថា មួយវិញទៀត ក៏សូមស្នើផងដែរ ដល់ភាគីថៃ សហការការប្រយុទ្ធប្រឆាំងព័ត៌មានក្លែងក្លាយ ការបង្ក្រាបឧក្រិដ្ឋកម្មជួញដូរមនុស្ស និងការទប់ស្កាត់ក្រុមប្រឆាំងដែលប្រើប្រាស់បណ្តាញសង្គមពីប្រទេសថៃ ដើម្បីធ្វើការវាយប្រហារ មកលើថ្នាក់ដឹកនាំរាជរដ្ឋាភិបាលកម្ពុជា ព្រមទាំងការប្រយុទ្ធប្រឆាំងឧក្រិដ្ឋកម្មជួញដូរគ្រឿងញាណតាមព្រំដែនកម្ពុជា-ថៃ ។
ជាការឆ្លើយតប ឯកឧត្តម ប្រាវីដ វង្សសុវណ្ណ បានសម្តែងការកោតសរសើរ ចំពោះការដឹកនាំប្រទេសឆ្ពោះទៅទទួលបានសុខសន្តិភាពពេញលេញ និងការអភិវឌ្ឍយ៉ាងឆាប់រហ័យលើគ្រប់វិស័យរបស់កម្ពុជា ដោយឯកឧត្តមបានបង្ហាញឆន្ទៈគាំទ្រ និងសន្យាទប់ស្កាត់ឱ្យបានចំពោះរាល់ការប្រើប្រាស់បណ្តាញសង្គមថៃ ដើម្បីប្រព្រឹត្តអំពើល្មើសច្បាប់ផ្សេងៗប្រឆាំងរាជរដ្ឋាភិបាលកម្ពុជានាពេលខាងមុខ។
ជាមួយគ្នានេះ ឯកឧត្តមឧបនាយករដ្ឋមន្ត្រី បានផ្ដាំផ្ញើសេចក្តីនឹករលឹក និងការសួរសុខទុក្ខចំពោះសម្តេចតេជោ ព្រមទាំងបានរំលឹកអំពីទំនាក់ទំនងដ៏ល្អ រវាងឯកឧត្តមជាមួយសម្តេច និងថ្នាក់ដឹកនាំជាន់ខ្ពស់កម្ពុជាជាច្រើនរូបទៀត។
ជាចុងក្រោយ ឯកឧត្ដមបណ្ឌិត សុខ សុក្រឹត្យា ក៏បានថ្លែងអំណរគុណរាជរដ្ឋាភិបាលថៃដែលតែងតែគាំទ្រ និងផ្តល់កិច្ចសហប្រតិបត្តិការយ៉ាងល្អជាមួយរាជរដ្ឋាភិបាលកម្ពុជា ជារៀងរហូតមក ព្រមទាំងបានសម្រេចដាក់ប្រទេសកម្ពុជាចូលក្នុងបញ្ជីប្រទេស ធ្វើដំណើរមកប្រទេសថៃដោយមិនតម្រូវឲ្យធ្វើចត្តាឡីស័ក ជាពិសេសក្នុងអំឡុងពេលវិបត្តិកូវីដ-១៩ រាជរដ្ឋាភិបាលថៃបានយកចិត្តទុកដាក់ និងសហការជួយសម្រួលបញ្ហាប្រឈមដល់ពលករខ្មែរចំណាកស្រុក និងនិស្សិតកម្ពុជាដែលស្នាក់នៅក្នុងប្រទេសថៃបានយ៉ាងល្អដូចប្រជាជនថៃផងដែរ៕ អត្ថបទ៖ បាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
