ក្រុមអ្នកតវ៉ាសិទ្ធិប្ដូរភេទរាប់ពាន់នាក់ បានប្រមូលផ្តុំគ្នានៅកណ្តាលទីក្រុងឡុងដ្រ៍ របស់ចក្រភពអង់គ្លេស កាលពីថ្ងៃសៅរ៍ (១៩ មេសា) ប៉ុន្មានថ្ងៃបន្ទាប់ពីតុលាការកំពូលបានកាត់សេចក្តីថា និយមន័យរបស់ស្រ្តីម្នាក់ ផ្អែកលើកំណើតជីវសាស្រ្តជានារីភេទ ហើយស្ត្រីកែភេទត្រូវដកចេញពីនិយមន័យផ្លូវច្បាប់នោះ។

ជាមួយនឹងភាពមិនសប្បាយចិត្តកាន់តែខ្លាំងឡើងលើអត្ថន័យនៃសេចក្តីសម្រេចសម្រាប់សិទ្ធិរបស់អ្នកកែភេទ ក្រុមអ្នកតវ៉ាបានប្រមូលផ្តុំគ្នាក្នុងអ្វីដែលគេហៅថាជា "បាតុកម្មបន្ទាន់" នៅទីលានចតុរង្គសភាអង់គ្លេស។ ក្រុមសកម្មជនបានទាមទារ "ការរំដោះជនប្ដូរភេទ" និង "សិទ្ធិសេរីភាពប្ដូរភេទ" ដោយមានខ្លះគ្រវីទង់ជាតិ និងកាន់បដាតវ៉ា។

ក្រុមអ្នកប្តូរភេទបារម្ភថា សេចក្ដីសម្រេចចិត្តដ៏សំខាន់កាលពីថ្ងៃពុធនោះ នឹងធ្វើឱ្យប៉ះពាល់ដល់សិទ្ធិរបស់ពួកគេ ទោះបីជាតុលាការកំពូលរបស់ចក្រភពអង់គ្លេសបាននិយាយថា អ្នកប្តូរភេទនៅតែទទួលបានការការពារពីការរើសអើងក៏ដោយ។ ប្រធានគណៈកម្មការសមភាព និងសិទ្ធិមនុស្ស បាននិយាយថា សេចក្តីសម្រេចនេះមានន័យថា ស្ត្រីកែភេទនឹងត្រូវដកសិទ្ធិមិនឱ្យចូលទីតាំងសម្រាប់ស្រ្តី ដូចជាបន្ទប់ទឹក មន្ទីរពេទ្យ និងក្រុមកីឡាជាដើម។

គួរឱ្យដឹងថា ក្នុងចំណោមប្រជាជនប្រហែល ៦៦លាននាក់នៅដែនដីអង់គ្លេស ស្កុតឡេន និងវេលស៍ គឺមានប្រហែល ១១៦.០០០នាក់ ត្រូវកំណត់អត្តសញ្ញាណថាជាអ្នកប្តូរភេទ នៅក្នុងជំរឿនចុងក្រោយបង្អស់។ វិញ្ញាបនបត្រទទួលស្គាល់យេនឌ័រប្រហែល ៨.៥០០ច្បាប់ ត្រូវបានចេញដល់បុគ្គលទាំងនោះ៕