ភ្ញៀវបរទេសកំពុងលុបចោលការធ្វើដំណើរទៅកាន់សហរដ្ឋអាមេរិកក្នុងចំនួនខ្ពស់បំផុត ខណៈសង្រ្គាមពាណិជ្ជកម្មរបស់ប្រធានាធិបតីអាមេរិក Donald Trump រីកកាន់តែធំ ដោយខែមីនា មានការធ្លាក់ចុះសម្រាប់អ្នកទៅដល់ជិត ១២% បើធៀបទៅនឹងឆ្នាំមុន។

ឧស្សាហកម្មទេសចរណ៍របស់សហរដ្ឋអាមេរិកបានរក្សាអតិរេកពាណិជ្ជកម្មយ៉ាងសំខាន់ជាមួយពិភពលោកជាយូរមកហើយ ដោយបង្កើតប្រាក់ចំណូលប្រហែល ១,៣ សែនកោដិដុល្លារសម្រាប់ឆ្នាំ២០២៤ និងជួយផ្ដល់ការងារប្រហែល ១៥លាននាក់ នេះបើយោងតាមសមាគមទេសចរណ៍សហរដ្ឋអាមេរិក។

យោងតាមទិន្នន័យពីរដ្ឋបាលពាណិជ្ជកម្មអន្តរជាតិរបស់សហរដ្ឋអាមេរិក ការថយចុះនេះត្រូវបានកត់សម្គាល់ជាពិសេសក្នុងចំណោមភ្ញៀវទេសចរមកពីអាមេរិកកណ្តាលដែលបានធ្លាក់ចុះ ២៤ ភាគរយ និងអឺរ៉ុបខាងលិចធ្លាក់ចុះ ១៧ ភាគរយ ដោយប្រទេសអាល្លឺម៉ង់ និងអេស្ប៉ាញបង្ហាញពីការធ្លាក់ចុះយ៉ាងខ្លាំងក្នុងចំនួន២៨ ភាគរយ ។

គួរកត់សម្គាល់ថាតួលេខទាំងនេះមិនរាប់បញ្ចូលភ្ញៀវទេសចរមកពីប្រទេសកាណាដា ដែលជាប្រភពទេសចរណ៍អន្តរជាតិដ៏ធំបំផុតទៅកាន់សហរដ្ឋអាមេរិកនោះទេ។ សមាគមទេសចរណ៍អាមេរិកប៉ាន់ប្រមាណថា ជនជាតិកាណាដាបានធ្វើដំណើកម្សាន្តទៅកាន់ទឹកដីអាមេរិកដ៏ច្រើនបំផុតក្នុងមួយឆ្នាំៗ ដោយគេចចេញពីរដូវរងាដ៏ធ្ងន់ធ្ងរ រហូតដល់វិស្សមកាលក្នុងរដ្ឋដូចជា Florida, Arizona និង California ជាកន្លែងដែលពួកគេបានចំណាយប្រាក់ជាង ២០ ពាន់លានដុល្លារ៕