ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានលើកឡើងថា សម្ដេចនឹងធ្វើឱ្យ ក្រុមអ្នកចូលចិត្តវិភាគពីសម្ដេច នឹងវិលមុខជាក់ជាមិនខាន។​

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវហេដ្ឋារចនាសម្ព័ន្ធផ្លូវជាតិលេខ១១ តភ្ជាប់ពីអ្នកលឿង ទៅថ្នល់ទទឹង និងផ្លូវក្នុងក្រុងព្រៃវែង នៅព្រឹកថ្ងៃទី៦ ខែធ្នូនេះ សម្តេចតេជោ ហ៊ុន សែន នាយករដ្ឋមន្ត្រី បានមានប្រសាសន៍ថា នឹងធ្វើឱ្យក្រុមអ្នកវិភាគមិនមានឱកាសធ្វើអ្វី ក្រៅពីវិភាគពីព័ត៌មាន សម្ដេច និងក្រុមគ្រួសារសម្ដេចនោះឡើយ។

​

កាលពីថ្ងៃទី៣ ខែធ្នូ ឆ្នាំ២០២១ ក្នុងបណ្ដាញសង្គមហ្វេសប៊ុកផ្ទាល់របស់សម្ដេចតេជោនាយករដ្ឋមន្ត្រី សម្ដេចបានសរសេរថា កន្លងមកមានក្មួយៗដែលនិយមលេងរូបថត បានផ្គុំរូបថតខ្ញុំជាមួយកូនប្រុសច្បងរបស់ខ្ញុំ ហ៊ុន ម៉ាណែត និងផ្គុំរូបថតខ្ញុំ និងភរិយាជាមួយរូបថត ម៉ាណែត និងភរិយា។ គាត់បានប្រា ប់ខ្ញុំថា លោកអ៊ំសង្ហាដូចបងម៉ាណែត និងក្មួយខ្លះនិយាយថា អ៊ំប្រុសអ៊ំស្រីសង្ហាដូចបងម៉ាណែត និងប្រពន្ធគាត់។

សម្ដេចតេជោបន្តថា ខ្ញុំបានប្រាប់ទៅក្មួយៗវិញថា តើម៉ាណែតបង្កើតអ៊ំ ឬ អ៊ំបង្កើតម៉ាណែត ?។ អត្ថបទមួយនេះនឹងធ្វើឱ្យក្រុមវិភាគយកទៅវិភាគបានហោចណាស់មួយសប្តាហ៍ ដើម្បីមានការងារធ្វើរកលុយចិញ្ចឹមជីវិត ឬ សុំសិទ្ធិជ្រកកោននៅក្រៅប្រទេស។ ថ្ងៃមុនគេវិភាគរឿងចៅទី២១ ស្រក់ទឹកភ្នែកតែមិនយំ ។ ល្អហើយ ខ្ញុំមានចៅ២២នាក់ និងកូនបង្កើតកូនប្រសា១០នាក់ទៀត ដែលខ្ញុំនឹងជួយពួកអ្នក ឱ្យវិភាគតែរឿងគ្រួសារខ្ញុំ ដោយមិនចាំបាច់ទៅវិភាគរឿងផ្សេងនាំលំបាក។ នេះជាវិធីរុញទូកបណ្តោយទឹក ដើ ម្បីតម្រូវចិត្តក្រុមវិភាគល្ងង់ទូ៕​ ដោយ៖ គង់ ឌិន