ប្រេសិតពិសេសរបស់សហរដ្ឋអាមេរិក ប្រចាំនៅរុស្ស៊ី និងអ៊ុយក្រែន គឺលោក Keith Kellogg បាននិយាយកាលពីថ្ងៃអាទិត្យ (២០ មេសា) ថា ក្រុមការងាររបស់លោកប្រធានាធិបតីអាមេរិក Donald Trump នឹងត្រឡប់ទៅកាន់ទីក្រុងឡុងដ្រ៍ ចក្រភពអង់គ្លេស ក្នុងសប្តាហ៍នេះសម្រាប់កិច្ចចរចាបទឈប់បាញ់ស្តីពីអ៊ុយក្រែន ប៉ុន្តែសមាជិកភាពរបស់អង្គការណាតូ របស់ទីក្រុងគីវ គឺ "ពុំមានលើតុចរចាទេ"។

លោក Kellogg បាននិយាយថា "លោកប្រធានាធិបតី Trump បានប្រឹងប្រែងច្រើនជាង ៩០ថ្ងៃមកហើយដើម្បីដោះស្រាយសង្រ្គាមនេះ ដែលជាជម្លោះដ៏ធំបំផុតនៅក្នុងទ្វីបអឺរ៉ុប ចាប់តាំងពីសង្រ្គាមលោកលើកទីពីរ ហើយលោកកំពុងជំរុញឆ្ពោះទៅរកដំណោះស្រាយ"។

លោក Kellogg បន្តថា "រឿងសមាជិកណាតូ មិននៅលើតុពិភាក្សាទេ។ អ៊ុយក្រែននឹងមិនអាចក្លាយជាផ្នែកមួយនៃអង្គការណាតូបានឡើយ ហើយនោះមិនមែនជារឿងថ្មីទេ គឺអាមេរិកធ្លាប់និយាយរឿងនេះតាំងពីខែកុម្ភៈ ឆ្នាំ២០០៨ មកម្ល៉េះ"។ ជាមួយគ្នានេះ លោកបន្ថែមថា កិច្ចព្រមព្រៀងរ៉ែគឺជាផ្នែកនៃដំណោះស្រាយសម្រាប់បទឈប់បាញ់ដ៏ទូលំទូលាយ និង "កិច្ចព្រមព្រៀងសន្តិភាពអចិន្ត្រៃយ៍"។

គួរឱ្យដឹងថា លោកប្រធានាធិបតីរុស្ស៊ី Vladimir Putin ចង់ឱ្យអ៊ុយក្រែន ទម្លាក់មហិច្ឆតារបស់ខ្លួនក្នុងការចូលរួមជាមួយអង្គការណាតូ ហើយឱ្យរុស្ស៊ី គ្រប់គ្រងតំបន់អ៊ុយក្រែនទាំងមូលដែលខ្លួនបានវាយដណ្ដើមយក ព្រមទាំងទំហំមានកម្រិតនៃកងទ័ពអ៊ុយក្រែន ដើម្បីដោះដូរនឹងសន្តិភាព។ ប៉ុន្តែទីក្រុងគីវនិយាយថា ការទាមទារទាំងនោះមានន័យធៀបនឹងការទាមទារឱ្យអ៊ុយក្រែនចុះចាញ់៕