យោធាអ៊ីស្រាអែល បាននិយាយកាលពីថ្ងៃអាទិត្យ ទី២០ ខែមេសា ថា ការពិនិត្យឡើងវិញលើការសម្លាប់បុគ្គលិកសង្គ្រោះបន្ទាន់នៅតំបន់ហ្កាហ្សាកាលពីខែមុន បានរកឃើញថាជា «កំហុសផ្នែកវិជ្ជាជីវៈជាច្រើន» ហើយមេបញ្ជាការម្នាក់នឹងត្រូវបណ្តេញចេញជុំវិញឧបទ្ទវហេតុនេះ។

ក្រុមគ្រូពេទ្យសង្គ្រោះបឋម ១៥នាក់ និងបុគ្គលិកសង្គ្រោះផ្សេងទៀត ត្រូវបានបាញ់សម្លាប់ កាលពីថ្ងៃទី២៣ ខែមីនា នៅក្នុងការបាញ់ប្រហារបីលើកផ្សេងគ្នានៅទីតាំងតែមួយ នៅជិតទីក្រុងរ៉ាហ្វា ភាគខាងត្បូងតំបន់ហ្កាហ្សា។ ពួកគេត្រូវបានកប់នៅក្នុងផ្នូររាក់មួយកន្លែងដែលសាកសពត្រូវបានរកឃើញមួយសប្តាហ៍ក្រោយមកដោយមន្ត្រីមកពីអង្គការសហប្រជាជាតិ និងអង្គការអឌ្ឍចន្ទក្រហមប៉ាឡេស្ទីន។

នៅក្នុងសេចក្តីថ្លែងការណ៍ដែលបានចេញផ្សាយកាលពីថ្ងៃអាទិត្យ យោធាបាននិយាយថា មន្ត្រីបញ្ជាការម្នាក់បានរងការស្តីបន្ទោស ហើយមេបញ្ជាការតំបន់ម្នាក់នឹងត្រូវបណ្តេញចេញពីតំណែង ដោយសារការផ្តល់របាយការណ៍មិនពេញលេញ និងមិនត្រឹមត្រូវ។

យោធាបាននិយាយនៅក្នុងសេចក្តីថ្លែងការណ៍ថា «ការពិនិត្យត្រូវបានកំណត់ថាមានកំហុសផ្នែកវិជ្ជាជីវៈជាច្រើន មានការបំពានលើបទបញ្ជា និងមានកំហុសចំពោះការរាយការណ៍អំពីឧប្បត្តិហេតុ»។

«ការបាញ់ប្រហារ នៅក្នុងឧបទ្ទវហេតុពីរលើកដំបូង បណ្តាលមកពីការយល់ខុសនៃប្រតិបត្តិការធ្វើឡើងដោយកងទ័ព ដែលជឿថាពួកគេប្រឈមមុខទៅនឹងការគំរាមកំហែងជាក់ស្តែងពីកងកម្លាំងសត្រូវ ហើយឧប្បត្តិហេតុលើកទីបី ពាក់ព័ន្ធនឹងការបំពានលើបទបញ្ជាអំឡុងពេលប្រយុទ្ធ»។