យោងតាមរបាយការណ៍ថ្មីៗ ដោយអង្គការ KFF ជាអង្គការគោលនយោបាយសុខភាព បានឲ្យដឹងថា ការព្រួយបារម្ភនៃការនិរទេស បានរារាំងដល់កម្មករកសិដ្ឋានបរទេសនៅក្នុងសហរដ្ឋអាមេរិកពីការស្វែងរកការថែទាំសុខភាព ដែលធ្វើឱ្យអន្តរាយដល់កិច្ចខិតខំប្រឹងប្រែងដ៏សំខាន់ក្នុងការទប់ស្កាត់ការរាតត្បាតជំងឺគ្រុនផ្តាសាយបក្សី ដែលអាចកើតមាន។

កម្មករផ្នែកទឹកដោះគោ និងបសុបក្សី មានករណីភាគច្រើននៃជំងឺផ្តាសាយបក្សីនៅក្នុងប្រទេស ហើយការការពារ និងការរកឃើញករណីក្នុងចំណោមពួកគេ គឺជាគន្លឹះក្នុងការទប់ស្កាត់ជំងឺរាតត្បាត។ ទោះជាយ៉ាងណា អ្នកជំនាញសុខភាពសាធារណៈបាននិយាយថា ពួកគេកំពុងជួបការលំបាកក្នុងការទៅដល់កម្មករកសិដ្ឋាន ដោយសារតែមនុស្សភាគច្រើនមិនហ៊ាននិយាយជាមួយអ្នកចម្លែក ឬត្រូវចាកចេញពីលំនៅឋាន។

កម្មករផ្នែកទឹកដោះគោ និងបសុបក្សី ប្រហែល៦៥នាក់នៅទូទាំងសហរដ្ឋអាមេរិក បានធ្វើតេស្តវិជ្ជមានជំងឺគ្រុនផ្តាសាយបក្សី ចាប់តាំងពីខែមីនា ឆ្នាំ២០២៤ ប៉ុន្តែអ្នកវិទ្យាសាស្ត្រជំងឺឆ្លង បានព្រមានថាចំនួនពិតប្រាកដនៃករណីឆ្លង ទំនងជាខ្ពស់ជាងនេះ។

បុគ្គលិកសុខាភិបាល បាននិយាយថា បញ្ហាកាន់តែខ្លាំងឡើង ចាប់តាំងពីមានការផ្លាស់ប្តូររដ្ឋបាល កាលពីខែមករា ឆ្នាំនេះ។ បុគ្គលិកនៅរដ្ឋ Michigan បាននិយាយថា «មនុស្សជាច្រើនមិនទៅជួបគ្រូពេទ្យនៅពេលនេះទេ ដោយសារតែស្ថានភាពអន្តោប្រវេសន៍»។