បាល់ទាត់៖ ក្រុមជំរើសជាតិកម្ពុជាបានចាប់ផ្តើមការប្រកួតពានរង្វាន់ជើងឯកអាស៊ាន AFF Championship របស់ខ្លួននៅថ្ងៃចន្ទម្សិលមិញជាមួយនឹងបរាជ័យ ៣-១ នៅកីឡដ្ឋាន Bishan ប្រទេសសិង្ហបុរី។ បន្ទាប់ពីការវាយសម្រុកខ្លាំងពីក្រុមម៉ាឡេស៊ី កម្ពុជាក៏ធ្វើឱ្យមានកំហុសក្នុងតំបន់គ្រោះថ្នាក់ដោយខ្សែការពារ កែន ចាន់សុភ័ក្រ ខណៈខ្សែប្រយុទ្ធម៉ាឡេស៊ី Muhammad Safawi Rashid ជាអ្នកស៊ុតសំរេចគ្រាប់នាំមុខ។
កម្ពុជាក៏មានឱកាសវាយបក និងស្ទើរតែរកបានគ្រាប់តាមស្មើទៅហើយដោយ សុះ ស៊ូហាណា នៅនឹងមុខទីតែអ្នកចាំទីម៉ាឡេស៊ីសង្គ្រោះបាន។ ឈានចូលវគ្គទី២ ម៉ាឡេស៊ីនៅតែជាក្រុមមានប្រៀបនឹងរកបាន ២គ្រាប់បន្ថែមទៀតមកលើកម្ពុជាដោយ Akhya Rashid នៅនាទីទី៦១ និង Kogi នាទីទី៧៨។ ហៀបនឹងចប់ការប្រកួតទៅហើយកម្ពុជាក៏តបបាន ១គ្រាប់វិញដោយបាល់ពិន័យ ១១ម៉ែត្រសំរេចបានដោយកីឡាករបម្រុងផ្លាស់ប្តូរចូល សាត រ៉ូស៊ីប នាទីទី៩០+១។ ក្រោយចប់ការប្រកួតគ្រូបង្វឹកម៉ាឡេស៊ីលោក Tan Cheng Hoe បាននិយាយថា ថ្វីបើក្រុមមានពេលតិចក្នុងការរៀបចំក្រុម តែលោកពេញចិត្តចំពោះទំរង់លេងរបស់កូនក្រុម តែលោកសង្ឃឹមថាប្រកួតទៅមុខទៀតក្រុមរបស់លោកនឹងកែប្រែឱ្យល្អជាងនេះទៀត។
ចំណែកអ្នកចាត់ការក្រុមជំរើសជាតិកម្ពុជាលោក Keisuke Honda ឱ្យដឹងដែរថា “ពួកយើងគូរតែរកបាន ១គ្រាប់រឺ ២គ្រាប់បន្ថែមទៀត ជាពិសេសក្នុងវគ្គទី១ ពួកយើងមានឱកាសពីរទៅបីលើក តែពួកយើងមិនខកចិត្តទេ ប្រវត្តិសាស្ត្របានប្រាប់យើងហើយថា ពួកយើងមិនដែលឈ្នះម៉ាឡេស៊ីឡើយ ហើយនេះក៏មិនមែនការជាប្រកួតងាយស្រួលសម្រាប់យើងដែរ តែយ៉ាងណាយើងប្រឹងប្រែងអស់ពីលទ្ធភាព ហើយលោកមានមោទនភាពចំពោះកីឡាករទាំងអស់ថ្ងៃនេះ”។ ប្រកួតបន្ទាប់របស់កម្ពុជានឹងបន្តជួបជាមួយឥណ្ឌូនេស៊ីនៅថ្ងៃទី៩ ខែធ្នូនេះ ខណៈម៉ាឡេស៊ីត្រូវជួបជាមួយឡាវថ្ងៃជាមួយគ្នានេះ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
