ក្នុងឱកាស អញ្ជើញជាអធិបតីសម្ពោធបើកឱ្យប្រើប្រាស់ជាផ្លូវការកំពង់ផែទេសចរណ៍អន្តរជាតិកំពត ស្ថិតនៅឃុំជើងក្រៀល ស្រុកទឹកឈូ ខេត្តកំពត នៅព្រឹក ថ្ងៃទី២១ ខែមេសា ឆ្នាំ២០២៥នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងអំណរគុណដល់អជ្ញាធររាជធានី ខេត្ត និងកងកម្លាំងគ្រប់លំដាប់ថ្នាក់ដែលបានចូលរួមរៀបចំតុបតែង ថែរក្សាសុខសុវត្ថិភាព ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរឱ្យដំណើរការទៅដោយសប្បាយរីករាយ និងមានសន្ដិសុខ សុវត្ថិភាព និងស្ថិរភាពជូនដល់ប្រជាពលរដ្ឋ និងភ្ញៀវទេសចរជាតិ អន្តរជាតិបានដើរលេងកម្សាន្តយ៉ាងសប្បាយរីករាយ។

សម្ដេចធិបតី នាយករដ្ឋមន្រ្ដី បង្ហាញមោទនភាពចំពោះអាជ្ញាធរគ្រប់លំដាប់ថ្នាក់ដែលបានខិតខំបង្កបរិយាកាសសប្បាយរីករាយក្នុងឱកាសឆ្នាំថ្មីនេះជូនដល់ប្រជាពលរដ្ឋបានលេងកម្សាន្ត និងមានការប្រទាក់ក្រឡាគ្នាល្អនៅគ្រប់រាជធានី ខេត្តទាំងអស់។ ក្រៅពីនេះ ប្រជាពលរដ្ឋបានយល់ដឹងកាន់តែច្បាស់ពីការបើកបរគោរពគ្នា និងកាត់បន្ថយគ្រោះថ្នាក់ចរាចរណ៍បានប្រមាណជាង ៤០ ភាគរយក្នុងឆ្នាំនេះ បើធៀបនឹងឆ្នាំមុន។ ជាមួយគ្នានេះសម្ដេចបានថ្លែងអំណរគុណដល់ទេសចរជាតិ អន្តរជាតិ និងអ្នកបង្កើតមាតិកានានាដែលបានចូលរួមផ្សព្វផ្សាយពីវប្បធម៌ ប្រពៃណីខ្មែរក្នុងឱកាសពិធីបុណ្យចូលឆ្នាំថ្មី ២០២៥នេះទៅកាន់សាកលលោកឱ្យបានឃើញ និងស្គាល់ពីកម្ពុជាផងដែរ។

សូមជម្រាបថា ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ រយៈពេល៣ថ្ងៃចាប់ពីថ្ងៃទី ១៤-១៦ ខែមេសា ឆ្នាំ២០២៥នេះ មានភ្ញៀវទេសចរ និងបងប្អូនប្រជាពលរដ្ឋ ដែលបានធ្វើដំណើរកម្សាន្តទូទាំងប្រទេស មានចំនួនប្រមាណជិត ២៤ លាននាក់ កើនឡើង ៩,៩% បើធៀបនឹងឆ្នាំ២០២៤ (ដែលមានចំនួន ២១.៨១៣.១៣៨ នាក់) ក្នុងនោះ៖ ក្នុងនោះមាន ភ្ញៀវជាតិ មានចំនួន ២៣.៨៦២.៣៥១ នាក់ និងភ្ញៀវអន្តរជាតិ មានចំនួន ១១៥.០៩០ នាក់៕អត្ថបទ៖ វ៉ន ដារ៉ា