​បាល់ទាត់៖ ​ក្រុម​ការពារ​តំណែង​ជើងឯក​អាស៊ាន AFF Championship វៀតណាម​បាន​យកឈ្នះ​ក្រុម​ក្បែររ​បង​ឡាវ ២-០ ដើម្បី​ឈរ​លេខ ២ ក្នុង​ពូ​ល B​។ ​​បន្ទាប់ពី​ការប្រកួត​ដ៏​តានតឹង​នៅ​វគ្គ​ជំ​រុះ World Cup ជុំ​ទី៣ វៀតណាម​គឺជា​ក្រុម​មានប្រៀប​ទៅហើយ​ទៅលើ​ក្រុមឡាវ ​ដែល​រៀប​យុទ្ធសាស្ត្រ​ការពារ​សំរាប់​ការប្រកួត​នេះ​។

​​យ៉ាងណាក្តី​ឡាវ​មិនអាច​ទប់​បាន​រហូត​នោះទេ តែ​ក៏​អាច​រក្សា​សំណាញ់​ឱ្យមាន​គ្រាប់​បាល់​តិច​ដែរ បន្ទាប់ពី​គ្រាប់​ដំបូង​របស់​វៀតណាម​ធ្វើបាន​ដោយ​កីឡាករ Nguyen Cong Phoung នៅ​នាទី​ទី២៦ និង​មួយ​គ្រាប់​ទៀត​នៅ​វគ្គ​ទី២ ដោយ Phan Van Duc នាទី​ទី៨៥​។ ​​វៀតណាម​គួរតែមាន​គ្រាប់​ទី៣ ទៅហើយ​តែ​បាល់ ១១ម៉ែត្រ​របស់ Vu Van Thanh ជួយ​បាន​ដោយ​អ្នកចាំទី​ឡាវ Keo Oudone​។ ​​ចប់​ការប្រកួត​ដែល​វៀតណាម​យកឈ្នះ ២-០ លើ​ឡាវ​នោះ​គ្រូ​បង្គោល​វៀតណាម​លោក Park Hang-soo និយាយថា លោក​ពេញចិត្ត​ចំពោះ​លទ្ធផល​ថ្ងៃនេះ បន្ទាប់ពី​កីឡាករ​របស់លោក​មួយ​ចំនួន​មាន​របួស​ពី​ការប្រកួត​ជំ​រុះ World Cup ហើយ​លោក​នឹង​មើល​ពី​ចំនុច​ខ្វះខាត​ថ្ងៃនេះ​ដើម្បី​រៀប​យុទ្ធសាស្ត្រ​ប្រកួត​បន្ទាប់​។

​​ចំណែក​គ្រូបង្វឹក​ឡា​វលោក V. Selvaraj ថា ​លទ្ធផល ២-០ នេះ​គឺអាច​ទទួលយកបាន ហើយ​ក្រុម​របស់លោក​គួរតែ​អាច​រក​គ្រាប់​បាល់​បាន​នៅ​ចុង​ម៉ោង​តែ​គ្មាន​សំណាង យ៉ាងណាក្តី​ពួកយើង​កែប្រែ​ចំនុច​ខ្វះខាត​សំរាប់​ការប្រកួត​បន្ទាប់​។ ​​ប្រកួត​បន្ទាប់​របស់​ឡា​វ​នៅក្នុង​ពូ​ល B នេះ​គឺ​ត្រូវ​ជួប​ក្រុម​ម៉ាឡេស៊ី​នៅ​ថ្ងៃទី៩ ខែធ្នូ​នេះ​ឯ​វៀតណាម​ក៏ត្រូវ​ជួប​ម៉ាឡេស៊ី​ដែរ​តែ​នៅ​ថ្ងៃទី១២ ខែ​ដដែល​៕

​អត្ថបទ​៖​នាង សុភា​វុ​ធ