សហរដ្ឋអាមេរិក និងហ្វីលីពីន នឹងចាប់ផ្តើមសមយុទ្ធយោធាប្រចាំឆ្នាំដ៏លេចធ្លោរបស់ពួកគេនៅថ្ងៃចន្ទ (២១ មេសា) នេះ ដែលត្រូវបានចាត់ទុកថាជា "ការហាត់សម" សម្រាប់ការការពារជាតិនៃប្រជាជាតិអាស៊ីអាគ្នេយ៍ ហ្វីលីពីន ស្របពេលមានភាពតានតឹងដែនទឹកដែលកំពុងបន្តជាមួយប្រទេសចិន។

ដោយដាក់ឈ្មោះថាសមយុទ្ធ "Super Bowl" នៅក្នុងតំបន់ ការហ្វឹកហ្វឺននៅឆ្នាំនេះក៏នឹងបង្ហាញថា រដ្ឋបាលលោកប្រធានាធិបតីអាមេរិក Donald Trump មានបំណងបន្តការគាំទ្រផ្នែកយោធារបស់ទីក្រុងវ៉ាស៊ីនតោន សម្រាប់សម្ព័ន្ធមិត្តដ៏យូរអង្វែងរបស់ខ្លួន ខណៈទីក្រុងម៉ានីល ប្រឈមនឹងសម្ពាធពីការអះអាងសិទ្ធិដ៏ធំរបស់ទីក្រុងប៉េកាំង នៅសមុទ្រចិនខាងត្បូង។

ទាហានប្រមាណ ១៤.០០០នាក់ រួមទាំងទាហានអាមេរិក ៩.០០០នាក់ គ្រោងនឹងចូលរួមនៅក្នុងសមយុទ្ធនេះ ដែលនឹងត្រូវធ្វើឡើងនៅទីតាំងភាគខាងលិច និងខាងជើងហ្វីលីពីន ទល់មុខនឹងសមុទ្រចិនខាងត្បូង និងកោះតៃវ៉ាន់ ដែលត្រូវបានគេចាត់ទុកថាជាចំណុចក្ដៅគគុកនៅក្នុងតំបន់។

បណ្ដាដៃគូការពារជាតិរបស់សម្ព័ន្ធមិត្តទាំងពីរ រួមមានអូស្ត្រាលី និងជប៉ុន ត្រូវបានគេរំពឹងថានឹងចូលរួមផងដែរ ខណៈប្រទេសជាច្រើនផ្សេងទៀតត្រូវបានអញ្ជើញឱ្យចូលរួមសង្កេតមើលសមយុទ្ធក្រោមឈ្មោះជាភាសាហ្វីលីពីនថា Balikatan ដែលប្រែថា "សមយុទ្ធប្រកៀកស្មា" នេះ ដែលដំណើរការរហូតដល់ថ្ងៃទី០៩ ខែឧសភា ខាងមុខ៕