បើយោងតាមសារព័ត៌មាន Reuters បានឲ្យដឹងថា ក្រុមហ៊ុនអាកាសចរណ៍ចិនបានចាប់ផ្តើមប្រគល់ត្រលប់នូវយន្តហោះរបស់ក្រុមហ៊ុន Boeing ទៅកាន់សហរដ្ឋអាមេរិកវិញហើយ ដោយថ្មីៗនេះ យន្តហោះ 737 Max មួយគ្រឿង បានចុះចតនៅមជ្ឈមណ្ឌលផលិតរបស់ក្រុមហ៊ុននេះ ក្នុងទីក្រុង Seattle កាលពីចុងសប្តាហ៍កន្លងមក។

បើយោងតាមសេចក្ដីរាយការណ៍របស់សារព័ត៌មាន Bloomberg News បានឲ្យដឹងកាលពីសប្តាហ៍មុនថា ការបញ្ជូនត្រលប់ទៅវិញកាលពីថ្ងៃសៅរ៍ (ទី១៩ ខែមេសា) បានកើតឡើងភ្លាមៗបន្ទាប់ពីប្រទេសចិនបានបញ្ជាឲ្យក្រុមហ៊ុនអាកាសចរណ៍របស់ខ្លួនកុំទទួលយកការបញ្ជូនយន្តហោះរបស់ក្រុមហ៊ុន Boeing បន្ថែមទៀត ដោយនេះជាការឆ្លើយតបទៅនឹងសហរដ្ឋអាមេរិកដែលដាក់ពន្ធ ១៤៥ភាគរយលើទំនិញរបស់ចិន។

គួរបញ្ជាក់ថា ដោយដកស្រង់សម្ដីពីបុគ្គល ២នាក់ដែលស្និទ្ធនឹងគម្រោងរបស់ក្រុមហ៊ុន Boeing សេវាព័ត៌មានអាកាសចរណ៍ The Air Current បានឲ្យដឹងថា យន្តហោះ 737 Max 8 ចំនួន ៣គ្រឿង ដែលដើមឡើយ ត្រូវបានត្រៀមរួចរាល់ នៅមជ្ឈមណ្ឌលដឹកជញ្ជូន Zhoushan របស់ក្រុមហ៊ុន Boeing សម្រាប់ក្រុមហ៊ុនអាកាសចរណ៍ចិនចំនួន២ ត្រូវបានបញ្ជូនទៅសហរដ្ឋអាមេរិកវិញ កាលពីសប្តាហ៍មុន។

សារព័ត៌មាន Reuters បានបញ្ជាក់កាលពីចុងសប្តាហ៍ថា សាក្សីម្នាក់បានឃើញយន្តហោះរបស់ក្រុមហ៊ុន Boeing ដែលត្រៀមសម្រាប់បញ្ជូនទៅក្រុមហ៊ុនអាកាសចរណ៍ Xiamen Airlines របស់ប្រទេសចិន ចុះចតនៅមជ្ឈមណ្ឌលផលិតយន្តហោះនៅទីក្រុង Seattle។ 

យន្តហោះដែលត្រូវបានលាបពណ៌តាមឡូហ្គូ Xiamen Airlines គឺជាយន្តហោះមួយគ្រឿង ក្នុងចំណោមយន្តហោះ 737 Max ជាច្រើនគ្រឿង ដែលកំពុងរង់ចាំការបញ្ចប់ការងារចុងក្រោយ នៅមជ្ឈមណ្ឌល Zhoushan ហើយបន្ទាប់មក ដឹកជញ្ជូនទៅកាន់ក្រុមហ៊ុនអាកាសចរណ៍ចិន។

ប្រព័ន្ធផ្សព្វផ្សាយ Fox News Digital បានទាក់ទងទៅក្រុមហ៊ុន Boeing និងក្រុមហ៊ុនអាកាសចរណ៍ Xiamen Airlines ដើម្បីសុំការអត្ថាធិប្បាយ ប៉ុន្តែមិនទទួលបានការឆ្លើយតបដូចគ្នា។ 

អំឡុងសន្និសីទសារព័ត៌មាន កាលពីថ្ងៃទី១៦ ខែមេសា ប្រធានអ្នកនាំពាក្យក្រសួងការបរទេសចិន លោក Lin Jian បាននិយាយថា លោក «មិនបានដឹង» ថា ប្រទេសចិនបានប្រកាសជាផ្លូវការណាមួយដែលប្រាប់ឲ្យក្រុមហ៊ុនអាកាសចរណ៍របស់ខ្លួនបដិសេធមិនទទួលយកដឹកជញ្ជូនយន្តហោះពីក្រុមហ៊ុន Boeing៕