ការគាំទ្រ ចំពោះប្រធានាធិបតីអាមេរិក លោក Donald Trump ពាក់ព័ន្ធនឹងសេដ្ឋកិច្ច បានធ្លាក់ចុះដល់កម្រិតទាបបំផុត ក្នុងអាជីពជាប្រធានាធិបតីរបស់លោក ដោយការមិនពេញចិត្តមានកាន់តែខ្លាំងឡើងៗ នៅទូទាំងគណបក្សធំៗទាំង២។

យោងតាមការស្ទង់មតិឈ្មោះ All-America Economic Survey (ការស្ទង់មតិជុំវិញបញ្ហាសេដ្ឋកិច្ចលើប្រជាជនអាមេរិកទាំងអស់) របស់ប្រព័ន្ធផ្សព្វផ្សាយ CNBC ដែលធ្វើឡើងនៅចន្លោះថ្ងៃទី៩ និងទី១៣ ខែមេសា បានបង្ហាញថា ការគាំទ្រ ចំពោះការដោះស្រាយផ្នែកសេដ្ឋកិច្ចរបស់លោក Trump ត្រូវបានរកឃើញមានកម្រិត ៤៣ភាគរយ បើប្រៀបធៀបទៅនឹងការមិនពេញចិត្តចំនួន ៥៥ភាគរយ។ នេះជាលើកទី១ ហើយ ដែលរូបលោកទទួលបានពិន្ទុអវិជ្ជមាន ពាក់ព័ន្ធនឹងបញ្ហាសេដ្ឋកិច្ច អំឡុងពេលកាន់តំណែងជាប្រធានាធិបតី។

ប្រព័ន្ធផ្សព្វផ្សាយ CNBC រាយការណ៍ថា ជនជាតិអាមេរិកប្រហែល ១.០០០នាក់ ត្រូវបានស្ទង់មតិទូទាំងប្រទេស ដោយកម្រិតល្អៀង ៣,១ភាគរយ។ 

ជារួម អ្នកឆ្លើយសំណួរ ៤៤ភាគរយ ពេញចិត្តនឹងការអនុវត្តរបស់លោក Trump ហើយ ៥១ភាគរយ មិនស្របតាម ដែលស្រដៀងនឹងការស្ទង់មតិរបស់ប្រព័ន្ធផ្សព្វផ្សាយ CNBC នៅចុងបញ្ចប់នៃអាណត្តិទី១ របស់លោក ក្នុងឆ្នាំ២០២០។ 

តែទោះជាយ៉ាងណាក្ដី ការធ្លាក់ចុះនៃការមានទំនុកចិត្តផ្នែកសេដ្ឋកិច្ចនេះ គឺកាន់តែបង្ហាញយ៉ាងច្បាស់លាស់ណាស់ ខណៈដែលសុទិដ្ឋិនិយមដែលបានកើតមានឡើងក្រោយការជាប់ឆ្នោតឡើងវិញរបស់លោក Trump បានធ្លាក់ចុះយ៉ាងខ្លាំង ដោយជំនួសមកវិញជាមួយនឹងការមានក្ដីបារម្ភកាន់តែខ្លាំងឡើងៗ អំពីសអតិផរិណា ការដំឡើងពន្ធ និងទិសដៅសេដ្ឋកិច្ច៕