ប្រធានាធិបតីនៃប្រទេសលីបង់ បាននិយាយថា ការរំសាយអាវុធក្រុមហេសបូឡា គឺជាបញ្ហា «ស្មុគស្មាញ» ខណៈដែលអាជ្ញាធរ បានរាយការណ៍ថា ការវាយប្រហាររបស់អ៊ីស្រាអែល បានសម្លាប់មនុស្ស ២នាក់ នៅភាគខាងត្បូងនៃប្រទេសកាលពីថ្ងៃអាទិត្យ (ទី២០ ខែមេសា)។

ការវាយឆ្មក់ជាបន្តបន្ទាប់ បានកើតឡើង បើទោះបីជាមានបទឈប់បាញ់កាលពីខែវិច្ឆិកាក៏ដោយ ដែលព្យាយាមបញ្ចប់អរិភាពជាង ១ឆ្នាំ ជាមួយក្រុមហេសបូឡា ដែលទីក្រុងវ៉ាស៊ីនតោន បាននិងកំពុងដាក់សម្ពាធលើរដ្ឋាភិបាលលីបង់ឲ្យដកអាវុធរបស់ក្រុមនេះ។

យោធាអ៊ីស្រាអែល បាននិយាយថា ខ្លួនបានសម្លាប់សមាជិករបស់ក្រុមហេសបូឡាចំនួន ២នាក់ និងបានកំណត់គោលដៅលើហេដ្ឋារចនាសម្ព័ន្ធយោធារបស់ក្រុមដែលគាំទ្រដោយអ៊ីរ៉ង់មួយនេះ។

លោកប្រធានាធិបតី លោក Joseph Aoun បាននិយាយថា ការរឹតបន្តឹង ដើម្បីមានការកាន់អាវុធតែបុគ្គលិករដ្ឋ គឺជា «បញ្ហារសើប និងស្មុគស្មាញ ដែលជាមូលដ្ឋានគ្រឹះ ក្នុងការរក្សាសន្តិភាពស៊ីវិល» ហើយតម្រូវឲ្យមាន «ការពិចារណា និងការទទួលខុសត្រូវយ៉ាងសមរម្យ»។

លោក Aoun បានប្រាប់អ្នកសារព័ត៌មានថា ប្រទេសលីបង់នឹងអនុវត្តសិទ្ធិស្របច្បាប់ផ្ទាល់ខ្លួនរបស់រដ្ឋ ជុំវិញបញ្ហាអាវុធនេះ «ប៉ុន្តែយើងត្រូវតែរង់ចាំភាពសមរម្យទៅតាមកាលៈទេសៈ» ដើម្បីអាចឲ្យរឿងនេះកើតឡើងបាន ដោយលោកបន្ថែមថា៖ «គ្មាននរណាម្នាក់និយាយមកកាន់ខ្ញុំ អំពីពេលវេលា ឬសម្ពាធអ្វីឡើយ»។

ក្រុមហេសបូឡា ដែលជាកងកម្លាំងដ៏មានឥទ្ធិពលនៅក្នុងប្រទេសលីបង់ ត្រូវបានធ្វើឲ្យចុះខ្សោយ អំឡុងសង្គ្រាមចុងក្រោយបង្អស់ជាមួយនឹងសត្រូវដ៏ធំបំផុតរបស់ខ្លួន ដែលរួមមានទាំងការលុកលុយផ្លូវគោករបស់អ៊ីស្រាអែល និងការទម្លាក់គ្រាប់បែកយ៉ាងធ្ងន់ធ្ងររយៈពេល ២ខែ ដែលបានកម្ចាត់ថ្នាក់ដឹកនាំរបស់ក្រុមសនេះ៕