មហាសេដ្ឋិនីវៀតណាម លោកស្រី Truong My Lan ត្រូវបានកាត់បន្ថយរយៈពេលជាប់ពន្ធនាគារមួយជីវិតមកត្រឹម ៣០ឆ្នាំ បន្ទាប់ពីឈ្នះបណ្ដឹងឧទ្ធរណ៍ជំទាស់នឹងសាលក្រមនៃការកាត់ក្តីលើកទី២ របស់លោកស្រី ពីបទចោទប្រកាន់នានា ដែលរួមមានទាំងការសម្អាតលុយកខ្វក់ផងដែរ។

អំឡុងសវនាការ នៅឯតុលាការប្រជាជនជាន់ខ្ពស់ ក្នុងទីក្រុងហូជីមិញ នាថ្ងៃចន្ទ (ទី២១ ខែមេសា) នេះ ចៅក្រមបានលើកឡើងថា គណៈវិនិច្ឆ័យបានពិចារណាដល់ភាពស្មោះត្រង់របស់លោកស្រី Lan និងការខិតខំប្រឹងប្រែងរបស់លោកស្រី ដែលព្យាយាមដោះស្រាយផលវិបាកនានា។

បើយោងតាមមេធាវីរបស់លោកស្រី បានឲ្យដឹងថា លោកស្រី Lan ដែលប្រឈមនឹងការកាត់ទោសប្រហារជីវិត ពាក់ព័ន្ធនឹងការកាត់ក្តីដាច់ដោយឡែកពីបទការក្លែងបន្លំដ៏ធំនោះ បាននិងកំពុងធ្វើការ ដើម្បីសងត្រលប់នូវទឹកប្រាក់រាប់រយលាន នៅក្នុងមូលនិធិធនាគារដែលត្រូវបានលួច។

អំឡុងសវនាការប្រហែល ១ខែ តុលាការបានដឹងឮថា ក្រុមមេធាវី និងក្រុមគ្រួសាររបស់លោកស្រី Lan បាននិងកំពុងធ្វើការជាមួយដៃគូបរទេស ដើម្បីបង្កើតផែនការសងបំណុលដល់អ្នកកាន់សញ្ញាបណ្ណ និងធនាគារ Saigon Commercial Bank ក្នុងរយៈពេលពី ២ ទៅ ៥ឆ្នាំ។

លោកស្រី Lan បាននិយាយអំឡុងមានដំណើរការនីតិវិធីថា៖ «ខ្ញុំសង្ឃឹមថា គណៈវិនិច្ឆ័យនឹងទទួលស្គាល់ការខិតខំប្រឹងប្រែងរបស់ខ្ញុំ ដើម្បីពិចារណា និងវាយតម្លៃករណីទាំងមូលប្រកបដោយមនុស្សធម៌»។

គួរបញ្ជាក់ថា លោកស្រី Lan បានក្លាយជាករណីដ៏ល្បីល្បាញបំផុតនៃការបង្រ្កាបអំពើពុករលួយរបស់បក្សកុម្មុយនីស្តកំពុងកាន់អំណាចរបស់វៀតណាម ដែលនាំទៅដល់ការឃុំខ្លួនមន្ត្រីជាន់ខ្ពស់ និងនាយកប្រតិបត្តិអាជីវកម្មជាច្រើននាក់។ ស្ត្រីវ័យ ៦៨ឆ្នាំរូបនេះ បានប្តឹងឧទ្ធរណ៍ជំទាស់នឹងការផ្ដន្ទាទោសជាប់ពន្ធនាគារមួយជីវិត បន្ទាប់ពីមានការកាត់ក្តីលើកទី២ ក្នុងខែតុលា ឆ្នាំ២០២៤ ជាពេលដែលលោកស្រី និងសហចុងចោទចំនួន ៣៣នាក់ ត្រូវបានរកឃើញថា មានទោសពីបទផ្ទេរដោយខុសច្បាប់នូវទឹកប្រាក់ប្រហែល ៤,៥ពាន់លានដុល្លារ ឆ្លងកាត់ព្រំដែនអន្តរជាតិ៕