ប្រធានាធិបតីអាមេរិកលោក ដូណាល់ ត្រាំ (Donald Trump)បាននិយាយថា មេដឹកនាំពិភពលោក និងសហគ្រិនជាច្រើន កំពុងស្នើសុំឲ្យទីក្រុងវ៉ាស៊ីនតោន កាត់បន្ថយពន្ធ។ លោកបានបង្ហោះការចុះផ្សាយដែលពាក់ព័ន្ធគ្នា នៅលើបណ្តាញសង្គម Truth Social កាលពីថ្ងៃអាទិត្យ។

លោក ត្រាំ បានសរសេរថា៖«ចាប់តាំងពីការប្រកាសនៃទិវារំដោះរបស់យើង មេដឹកនាំពិភពលោក និងនាយកប្រតិបត្តិពាណិជ្ជកម្មជាច្រើន បានមករកខ្ញុំ ដើម្បីសុំការបន្ធូរបន្ថយពីពន្ធគយ» ដោយបញ្ជាក់ថា ពួកគេ «ត្រូវតែកែតម្រូវកំហុស» ។

យោងតាមលោកប្រធានាធិបតីបានឲ្យដឹងថា សហរដ្ឋអាមេរិក រំពឹងថា នឹង «កសាងទ្រព្យសម្បត្តិឡើងវិញ» និង «បង្កើតការគាំទ្រទៅវិញទៅមកពិតប្រាកដ» នៅក្នុងទំនាក់ទំនងពាណិជ្ជកម្ម។

កាលពីថ្ងៃទី ០២ ខែមេសា លោក ត្រាំ បានប្រកាសពីការកំណត់ពន្ធលើផលិតផលពី ១៨៥ប្រទេស និងដែនដី។ ប្រទេសរុស្ស៊ី មិនស្ថិតនៅក្នុងបញ្ជីនេះទេ។ ពន្ធសកល ១០% ចូលជាធរមាន នៅថ្ងៃទី ០៥ ខែមេសា ពន្ធលើផលិតផលជាក់លាក់ ចូលជាធរមាន នៅថ្ងៃទី ០៩ ខែមេសា។